Ant publicadu in su “Diari Oficial de la Generalitat de Catalunya”, su bulletinu ufitziale de sa Regione catalana, 95 tèrmines catalanos noos normalizados dae su Cussìgiu Supervisore de su TERMCAT in su primu cuadrimestre de su 2024.
B’at de notare in manera particulare, pro nùmeru de tèrmines, sos paràgrafos dedicados a s’alimentatzione e a sa gastronomia, sos audiovisuales e sa zoologia.
Su paràgrafu de alimentatzione e gastronomia est dedicadu, in manera integrale, a sa gastronomia giaponesa, semper prus populare, e pertocat tèrmines comente edamame, fideu udon, maki, hossomaki o maki petit, misso, ramen, niguiri, tataki, uramaki o wassabi.
In su paràgrafu de sos audiovisuales b’at tèrmines relatzionados cun sa televisione e su tzìnema: distopia, docudrama o drama documental, docuficció, docusèrie, fals documental, ucronia, etc.
In su grupu de tèrmines de zoologia b’at unos chimbanta nùmenes de mammìferos chi galu non teniant una forma catalana fissada (gòfer d’Attwater, gòfer de Willamette, gòfer sud-oriental, nòctul gegant, nòctul gros, nòctul muntanyenc, etc.). Totu custos tèrmines sunt ligados a su “Diccionari dels mamífers del món”, elaboradu dae sa “Fundació Barcelona Zoo” e dae su TERMCAT cun sa collaboratzione de su “Museu de Ciències Naturals” de Granollers.
Sunt istados normalizados finas tèrmines de informàtica e TIC (bot, bot de conversa o assistent de veu, assistent virtual, etc.), de indùstria chìmica (reformació, reformació amb vapor, reformació en sec, reformat, etc.) e de intzèndios (incendi de toll o incendi de bassal, incendi de vessament).
Sas ischedas cumpletas de totu custos tèrmines si podent cunsultare in su web de su TERMCAT (in sa Neoloteca e in su Cercaterm) e finas in Optimot. In sa Neoloteca si crarint, in prus, sos critèrios chi at sighidu su Cussìgiu Supervisore pro aprovare custos tèrmines.
Su Cussìgiu Supervisore est s’òrganu chi s’incàrrigat in manera ufitziale de sa normalizatzione de sa terminologia in limba catalana e est formadu dae linguistas e ispetzialistas ligados a su TERMCAT e a s’Istitutu de Istùdios Catalanos.
