B’at tempus finas a su 22 de abrile pro pigare parte a sa XVIII editzione de su Prèmiu de poesia in limba sarda “Benvenuto Lobina” de Biddanoa ‘e Tulu aprontadu dae s’amministratzione locale. Sos organizadores de sa manifestatzione, cun sa tzerimònia finale de premiatzione chi est giai programmada pro su 7 de làmpadas, ant in pessu publicadu su bandu chi interessat a totu sos poetas de Sardigna, fintzas a sos chi no istant in custa terra. Duas sa setzione de su cuncursu (cun possibilidade de imbiare cumponimentos in rima o mancu pro una o pro ambas): sa prima est dedicada a sa poesia cun tema s’amore; sa segunda pertocat cada argumentu. Caraterìstica comune de sas duas categorias est chi sos iscritos devent èssere inèditos, e duncas nemmancu mai premiados in àteros cuncursos, e non prus longos de sos 40 versos. In giuria, cun presidente Salvatore Tola, sa vitze sua Anna Cristina Serra e sos cumponentes Franca Marcialis, Paolo Boi e Sandro Ghiani. In prus de su primu pannu, in ambas setzione b’at a èssere su pòdiu intreu cun sa segunda e cun sa de tres positziones e sas mentziones de onore. Sas modalidades de imbiu sunt sas chi sunt nòdidas pro custa casta de prèmios: testu cun pseudònimu e generalidades (nùmene, sambenadu, indiritzu, nùmeru de telèfonu, indiritzu e-mail e pseudònimu) a banda e plicu de imbiare via posta a Premio di poesia sarda “Benvenuto Lobina”, Comune di Villanova Tulo, Via Cagliari 34, 09066 Villanova Tulo (SU). S’àtera optzione est sa prus lestra imbiende totu cantu via mail a s’indiritzu premio.benvenutolobina@gmail.com. De custa manera tocat a imbiare su testu in formadu pdf chi non siat editàbile e chi siat firmadu fintzas issu cun unu pseudònimu. Cun unu segundu documentu alliongiadu cherent inditados sos datos personales e su pseudònimu impreadu.
mauro piredda
Leave a comment