Sas abbas chi sas àeras ant ghetadu sas chidas coladas diat pàrrere chi nch’apant istesiadu su problema de sa sicagna in Baronia. E fintzas sas polèmicas ingendradas dae s’abertura de sas paratias de sa diga de Torpè (polèmicas chi a riu faladu pariant pròpiu che a s’abba currende a mare), parent cosa derubricada dae s’agenda.
Ma chie istat in cussos logos ischit chi diat pòdere bastare unu tempus nemmancu tropu mannu sena abba pròida pro torrare a cando in sas biddas serraiant sas iscetas. Annanghemus·bi su beranu acurtziende·si·nche e sos turistas chi no ant a tardare a si presentare, cun sas esigèntzias issoro.
Como, pagu prus o mancu dae unu mese, in cussu lagu b’at unos 22 milliones de metros cubos de abba; est su chi cussa diga podet càbere, de prus non bi nd’istat, pagu de nàrrere b’at.
In su territòriu non mancant sas propostas. Su comitadu Abbanostra narat chi «mancant sas connessiones adotadas in àteros invasos de Sardigna». Duncas bi diat chèrrere unu «collegamentu cun sas digas de Pedra Othoni (in su Tzedrinu) e de su Lìscia (in Gaddura) pro su bilantziamentu pluriennale e pro sa distributzione».
Ma in su matessi territòriu si faeddat finamentas de sa possibilidade de impreare s’abba de su sistema càrsicu de su Monte Arvu, chi petzi in parte alimentat sa rete dae su potabilizadore de Fruncu ‘e ‘Oche, in Thiniscole.
«Su sistema càrsicu – narat Francesco Murgia de s’òrdine de sos geòlogos de Sardigna – non podet èssere sa solutzione pro su nùmeru de utèntzias istiales, cando lompent a inoghe 500mìgia persones. Gente chi at bisòngiu de una cantidade de abba chi nche bàrigat sa chi unu cale si siat sistema càrsicu diat pòdere frunire».
Duncas? sende chi sa diga de Macheronis l’ant fata cando sas esigèntzias fiant inferiores a sas chi bi sunt como, diat tocare de intervènnere in su sistema de distributzione chi a su presente perdet su 60% e barda de risorsa ìdrica. «Intervenende in cue – narat Murgia – diamus àere sas rispostas in contu de cantidade de abba chi si diat pòdere erogare».
E custa est cosa chi narant finas sos de AbbaNostra. E chie si siat pensat chi su bonu de s’abba la perdimus gasi e non cando aberint sas paratias pro chistiones de seguresa.
fonte immàgine https://www.regione.sardegna.it/notizie/innalzato-il-livello-dell-invaso-della-diga-di-maccheronis-sul-rio-posada
mauro piredda
Leave a comment