In Aristanis sos tzitadinos e sos sìndigos ant partetzipadu a una manifestatzione pro difèndere su diritu a sa salude pro sos residentes de sa Sardigna de mesu e pro pedire a Regione e ARES de decrarare s’istadu de emergèntzia pro sa sanidade de cussa area geogràfica chi andat dae Aristanis a Tortolì. A la promòvere su Comitadu pro su diritu a sa salude de sa provìntzia de Aristanis, cun su coordinamentu de sos Comitados e sos Assòtzios de sa Sardigna de mesu.
Sos sìndigos e sos rapresentantes de sos Comitados ant sutaliniadu sa mancàntzia de prestatziones sanitàrias in sas provìntzias de Aristanis e Nùgoro, cun repartos chi sunt tanchende o traballant a tempus partziale e s’acentramentu de sos servìtzios in sos duos polos de su cabu de susu e de giosso de sa Sardigna. E si sos ospidales Santu Martine de Aristanis e Santu Frantziscu de Nùgoro sunt patinde, no istant mègius sos de Bilàrtzi, Lanusè e Bosa.
Pro cussu a sa Regione pedint de garantire servìtzios pèrperes in sos territòrios, investinde in su capitale umanu e in sas infrastruturas, si nono su bonu de sas istruturas sanitàrias de primore s’ant a acatare petzi in Casteddu, Tàtari e fortzis in Terranoa.
Mariantonietta Piga