«Sa rivolutzione de s’intelligèntzia artifitziale e de su digitale depet èssere fintzas una rivolutzione pro sa paridade de gènere». Est cosa chi at naradu su Segretàriu generale de su Cussìgiu de Europa, Alain Berset, sas dies coladas cun s’8 de martzu acurtziende·si·nche. «Paris – galu , podimus derrùere sas barrieras pro fraigare unu benidore in ue sas fèminas e sas pitzocas ghient, annoent e giugant a dae in antis su mundu digitale».
Paràulas chi nos contant de unu progressu partziale. Fintzas ca, cunforma a sos datos de su World economic forum, est petzi de su 22% sa cuota mundiale de professionistas fèminas in su setore de s’Ia. Sa chistione est problemàtica: si a un’ala s’intelligèntzia artifitziale diat pòdere fàghere meda pro reduire su gender gap, sa fòrfighe in favore de sos òmines, a s’àtera diat pòdere perpetuare sas disparidades, afortire sos istereòtipos de gènere, cunfirmare sos pregiudìtzios chi diamus chèrrere eliminare.
Ischimus, difatis: chi s’annestru de sos algoritmos movet dae datos istòricos chi non semper sunt nèutros; chi in paritzas partes de su mundu s’atzessu a sa tecnologia e a s’istrutzione no est che pare intre òmines e fèminas; chi s’automatzione podet cajonare dannos a setores cun grandu presèntzia de traballadoras; chi una suta-rapresentàntzia feminile fartosa in sas iscuadras de isvilupu de s’Ia podet determinare una progetatzione e un’implementatzione de sas tecnologias chi non pigant in cunsideru sas esigèntzias issoro.
Est pro custu chi su Cussìgiu de Europa est elaborende unas cantas racumandatziones in contu de Ia. «S’agualidade de gènere e sa promotzione de sos diritos de totu sas fèminas e de sas pitzocas – leghimus – sunt parte manna de su traballu de su Cussìgiu e sunt fundamentales pro sa Cunventzione cuadru noa in contu de Ia, su primu tratadu internatzionale vinculante a livellu giurìdicu in custu campu».
Gianfranca Orunesu
Leave a comment