Sos Hull Kingston Rovers ant bintu su World Club Challenge, su mundiale pro iscuadras de club de rugby a 13 chi ogna annu ponet una contra a s’àtera su club campione de sa Superleague inglesa e sos campiones de sa NRL australiana.
Ant giogadu, cun kick off a sas 19,30 locales de giòbia 19, in su Hull City Stadium, in ue giogant s’iscuadra de fùbalu de sa tzitade, s’Hull A.F.C., e s’àtera iscuadra de rugby a 13, s’Hull F.C., seberadu pro èssere prus mannu meda de s’istàdiu de s’Hull K.R.
Sos inglesos, in màllia ruja, sunt partidos forte marchende sa prima meta a su 7’ cun su pilone australianu Amone chi at regortu unu grubber de su medianu de mìschia samoanu May.
A su 13’ sa segunda meta cun su capitanu Minchella, a sa fine de un’atzione cumintzada cun un’errore in ritzetzione de s’estremu australianu Reece dae tiru artu de Lewis.
A su 22’ tocat a s’ala manca Burgess chi realizat sa de tres metas regollende su grubber de su tallonadore Litten.
Sos Broncos in finale de tempus si ponent in motu e dae un’atzione a sa manu cumintzada dae Reece mandant in meta su tzentru Shibasaki a su 29’.
A su 50’ Shibasaki mancat sa ritzetzione dae tiru artu de Lewis, Martin aferrat sa botza e passat a su tzentru Gildart (in sa foto) pro ateruna meta inglesa, custa puru trasformada.
A su 56’ sos britànnicos marcant galu: su neozelandesu Hiku regollet unu grubber de May pro su 30-4, cun totu sas metas inglesas trasformadas.
Cando sa partida paret finida però sos Broncos marcant tres metas in 6’ minutos: a su 61’ cun Carrigan, a su 63’ cun Mariner e a su 66’ cun Shibasaki. A su 77’ ateruna meta australiana cun su tzentru Staggs, pro su 30-24, cun Reynolds chi faddit sa trasformatzione.
Sos Robins, custu su paranùmene de sos inglesos, renessent a resìstere a s’ùrtimu atacu disisperadu de Brisbane e binchent sa copa. Su tallonadore inglesu Litten est nominadu mègius giogadore in campu.
Sa de ocannu fiat sa de 29 editziones ufitziales, cunsiderende sa de 1997 cun fòrmula diferente, de unu torneu cumintzadu in su 1989 chi dae su 2000 est disputadu cun regularidade. Su primadu de vitòrias ddu tenent Wigan e Sidney Roosters cun chimbe trofeos peròmine. Sos Broncos ant bintu duas bortas, pro Hull KR est sa prima.
Hull Kingston Rovers: 1 Mourgue, 2 Davies, 3 Hiku, 4 Gildart, 5 Burgess, 6 Lewis, 7 May, 8 Sue, 9 Litten, 10 Amone, 11 Hadley, 12 Batchelor, 13 Minchella; intercàmbios 15 Luckley, 16 Whitbread, 17 Martin, 19 Lawton; 18th man (a dispositzione in casu de infortùniu) 18 Brown; riservas 14 Broadbent, 22 Leyland, 29 Whitehead. Tècnicu Willie Peters (Austràlia).
Brisbane Broncos: 1 Walsh, 2 Karapani, 3 Staggs, 4 Shibasaki, 5 Mariner, 6 Mam, 7 Reynolds, 8 Jensen, 9, Paix, 10, Haas, 11 Gosiewski, 12 Riki, 13 Carrigan; intercàmbios 14 b. Hunt, 15 Willison, 16 Talty, 17, Tawiha; 18th man Anderson. Tècnicu Michael Maguire (Austràlia).
(gianni muroni)
Leave a comment