Immàgine leada dae su profilu X de Brian Tamaki
Sàbadu 15 de freàrgiu in Auckland, sa prus tzitade manna de sa Nova Zelanda, unu grupu de maori at manifestadu, cun una haka, in dae in antis de un’isfilada organizada dae sos colletivos omosessuales, mutida Rainbow Parade.
Sos manifestantes, totu pitzocos, faghent parte de su ManUp, su movimentu maschile, costituidu in 2015, de sa Destiny Church, crèsia pentecostale fundada in su 1998 e galu dirìgida dae Brian Tamaki.
In antis de blocare pro carchi minutu sa manifestatzione aiant protestadu contra a un’eventu pro pitzinnos in ue fiat protagonista una drag queen.
Su prus de sos fideles de sa crèsia, carchi mìgia de persones, presentes finas in carchi tzitade australiana, sunt maoris. A s’apartenèntzia religiosa duncas si agiunghet s’apartenèntzia ètnica. Totu custu caraterizadu dae una lìnia polìtica cunservadora.
Sa predicatzione andat a in antis cun una forma de recùperu sotziale dae situatziones de violèntzia e emarginatzione. Dae su 2008 sa crèsia est finas Urban Maori Authority, Iwi Tapu in maori, pro garantire a sos indìgenos chi bivent in sas tzitades e a tesu dae sas tribùs rurales de èssere parte issos puru de una comunidade.
Intervistadu subra sos fatos su primu ministru Luxon at naradu ca sos maoris de sa Destiny Church ant esageradu e chi sa Nova Zelanda amparat sas diversidades. Tamaki at rispostu ca su guvernu aiat promìtidu de lassare s’agenda woke ma chi sas cosas sunt finas impeorende.
Dae custu fatu essit a pìgiu su cortotzicùitu de sas sotziedades modernas chi si cunsìderant incrusivas. Cando ddo’at duas positziones contràrias, chi arribant a atumbare a pare, chie tenet resone? Balent prus sos deretos de unu grupu sotziale caraterizadu dae s’identidade sessuale o sos deretos de unu grupu caraterizadu dae s’identidade religiosa e in custu casu finas ètnica?
(gianni muroni)
Leave a comment