Eris 28 de maju su Cussìgiu Presidentziale de transitzione de Haiti at nominadu comente primu ministru ad interim a Garry Conille. Leat su postu de Michel Patrick Boisvert, chi fiat intradu comente premier provisòriu a pustis de sas dimissiones de Ariel Henry de su 24 de abrile de ocannu.
Conille at leadu ses de sete votos de su Cussìgiu, est a nàrrere totu sas preferèntzias de sos chi fiant presentes in su momentu de s’eletzione.
S’òmine, de 58 annos, est giai istadu primu ministru de su paisu latinoamericanu intre santugaine de su 2011 e maju de su 2012.
Custu est su primu passu de su Cussìgiu Presidentziale de transitzione, chi in prus tenet su còmpitu de seberare sos esponentes de s’esecutivu e de proclamare sas eletziones generales a sa fine de s’annu chi benit.
S’istadu afroamericanu, vìtima de un’unda de terrore iscadenadu dae sas bandas criminales, est isetende s’interventu de sa fortza internatzionale de paghe ghiada dae militares kenyanos, cun s’amparu de s’ONU, chi diat dèpere leare su controllu de sa situatzione.
Est dae su 7 de trìulas de su 2021, cando ant mortu a Jovenel Moïse, su presidente, chi sa polìtica at pèrdidu su controllu de s’istadu. Sas bandas atacant cummissariados de politzia e presones e controllant pagu prus a mancu s’80% de su territòriu de sa capitale Port-au-Prince.
Conille, nàschidu in su 1966, est dotore. Est cojuadu e tenet duas fìgias. Su babbu, Serge, est istadu ministru de s’Ispòrt in su guvernu de Papa Doc Duvalier.
At traballadu a diferentes livellos in agentzias de s’ONU, che a s’UNFPA (United Nations Population Fund) e s’UNDP (United Nations Development Policy). In su mese de ghennàrgiu de su 2023 dd’aiant nominadu diretore regionale de s’UNICEF pro s’Amèrica Latina e su Caribe.
Conille at publicadu in X (ex Twitter) custu messàgiu in crèolu haitianu:
«Mwen santi m onore anpil dèske Konsèy Prezidansyèl la chwazi mwen kòm nouvo Premye Minis Ayiti. Map pwofite di mèsi anpil a tout òganizasyon nan sosyete sivil la, pati politik yo, ak manm dyaspora a ki pwopoze non mwen pami lòt kandida nan pwosesis la. Ansanm, nou pral travay pou yon demen miyò pou tout pitit nasyon nou an».
Est a nàrrere:
«So onoradu meda de èssere istadu elègidu dae su Cussìgiu Presidentziale comente Primu Minitru nou de Haiti. Torro gràtzias a totu sas organizatziones de sa sotziedade tzivile, a sos partidos polìticos e a sos esponentes de sa diàspora chi m’ant propostu. Paris amus a traballare pro unu mègius cras pro sos pipios de sa natzione nostra».
(gianni muroni)