Foto leada dae su profilu X de Orla Joelsen @OJoelsen
A pustis de sas eletziones de s’11 de martzu su guvernu groenlandesu, ghiadu dae su primu ministru Jens-Frederik Nielsen
at leadu forma, su 27 coladu. Nde faghent parte bator de sos chimbe partidos presentes in su parlamentu locale. S’ùnicu che est abarradu foras est Naleraq, chi tenet sas positziones indipendentistas prus craras.
Chenàbura 28 su vitzepresidente de sos Istados Unidos Vance, paris cun sa mugere, at visitadu sa base americana de Pituffik, fatu chi sos gronlandesos ant interpretadu comente una provocatzione, bida s’intentzione manifestada dea Trump de inglobare sa ex colònia vichinga. Vance at acusadu sa Danimarca de no àere tentu coidadu de s’ìsula e, finas escludende un’interventu militare, est seguru chi ddo’at àere in carchi modu un’acordu cun sos USA.
A pustis de custa vìsita su primu ministru Nielsen at decraradu, in su pàgina sua Facebook, riferende·si pròpiu a sas frases de su presidente americanu: «Nois no apartenimus a nemos. Detzidimus nois de su benidore nostru… depimus mustrare in modu craru e tranchillu a su presidente americanu ca sa Groenlàndia est nostra. Fiat de gasi eris, est de gasi oe e de gasi at a èssere in su benidore».
In custa partida diplomàtica intrat puru sa Danimarca. Su primu ministru Mette Frederiksen at fatu a ischire, semper in Facebook, sa positzione de s’istadu iscandinavu: «Ischint bene ca sa Groenlàndia non cheret fàghere parte de sos Istados Unidos. Si dd’ant comunicadu sena de dudas a livellu pùblicu paritzas bortas…»
Mèrcuris 2 de abrile Frederiksen at a èssere in Groenlàndia in bia ufitziale. Nielsen at ammentadu, galu in sa matessi rete sotziale, de àere cuncordadu atopos cun sa Danimarca, cunsideradu chi est su paisu chi tenent relatziones prus istrintas.
Nielsen at agiuntu de s’isetare, cun sos danesos, una collaboratzione costrutiva in su tempus benidore.
(gianni muroni)
Leave a comment