Foto leada dae sa pàgina Facebook de Jens-Frederik Nielsen
Sas eletziones groenlandesas de s’11 de martzu coladu ant dadu sa vitòria a su partidu Demokraatit, de orientamentu sotzial-liberale.
Cun su 30,3% de sos votos at otènnidu 10 de sos 31 iscannos de su parlamentu locale.
A su segundu postu, cun su 24,8% de sos votos e oto iscannos, ddo’est su partidu de destra Naleraq.
Como su presidente de Demokraatit, Jens-Frederik Nielsen, est chirchende de costituire su guvernu nou. At decraradu, a su giornale groenlandesu Sermitsiaq, chi totu sas solutziones pro pònnere paris una coalitzione, indispensàbile pro formare s’esecutivu, bidu su sistema proportzionale in vigore, sunt possìbiles.
De sos chimbe partidos unu ebbia, Atassut, est unionista. Sos àteros, a chie in unu modu e a chie in un’àteru, tenent a obietivu s’indipendèntzia dae sa Danimarca.
Nielsen, de sa leva de su 1991, est istadu ministru de su traballu pro unos noe meses, intre su 2020 e su 2021.
A pustis de èssere istadu elègidu a sa presidèntzia de su partidu suo dd’at retiradu dae su guvernu. Sas eletziones de su 2021 no ant tentu èsitu positivu pro Demokraatit, ma ocannu at a èssere issu a ghiare sa Groenlàndia in custu momentu delicadu e detzisivu de s’istòria sua.
Su caminu pro s’indipendèntzia paret giai cumintzadu. Est a bìdere si una borta lìberos dae su ligàmene cun sa Danimarca sos groenlandesos ant a seberare de abarrare pro contu issoro o ant a tzèdere a sas lusingas de s’amministratzione Trump, chi cunsìderat s’ìsula de importàntzia istratègica vitale pro sos Istados Unidos.
Unu primu inditu paret chi bèngiat pròpiu dae su partidu de Nielsen, chi s’est giai espressadu contra a s’unione cun sos americanos.
In ogna modu, in casu de indipendèntzia sa Groenlàndia at a èssere unu paisu de sas Amèricas finas a livellu polìticu e non dae unu puntu de bista geogràficu ebbia.
(gianni muroni)
Leave a comment