Su mitu de sas natziones sena istadu agradesset galu a sos giòvanos. Custu est essidu a campu in ocasione de su Segundu atòbiu internatzionale de sa Gioventude Indipendentista acumpridu eris, a merie, in sa sala Cosseddu Ersu in Sa Duchessa in Casteddu. Aparitzadu dae su Movimentu de is istudentes de s’universidade de ‘Scida’, su cunvènniu at postu paris esperièntzias diferentes de giovanos de movimentos indipendentistas dae paritzos chirros de s’Europa e de s’Oriente. Presentes, cun profetu, pitzocos catalanos, bascos, corsicanos, irlandesos, palestinesos e curdos.
Totu sos interventos ant postu in craru s’importu de sa chistione de sas limbas de minorias, ma de custas limbas, a dolu mannu, si nd’at intesu faeddare pagu.Petzi sos catalanos de Esquerra Republicana Andreu Criquet e Teresa Rovira ant impreadu sa limba issoro pro acrarire comente, su pòpulu catalanu, est pòtzidu lòmpere, pustis de 30 annos de traballu linguìsticu colletivu a sa consulta de su 9 santandria. E s’esempru catalanu mustrat a manera crara comente isparghinare sa limba unitària ‘pròpia’ afòrtigat su sentidu de autodeterminatzione de unu pòpulu.
Gasi no est pro s’Irlanda de su Nord (rapresentada dae Orla ‘O Leary e Ryan Mecrory de su Sinn Fein) e pro sa Còrsica (de sa cale at faeddadu Petru Vesperini a nòmene de sa Ghjuventù Indipendentista) in ue sos problemas cun su domìniu britànicu e frantzesu sunt medas. Peus galu sa situatzione in sos Paisos Bascos frantzesos. <Non b’at perunu amparu in Frantza pro sa limba nostra – at contadu Yoritz Larraza – e su presidente betzu Sarcozy aiat naradu, pro nos mòrrere, chi sos bascos in Frantza no esistiant>.
Totu un’àteru mundu cussu contadu dae Khaked El Qaisi, palestinesu de sa Tzisgiordania, chi at defensadu cun apentu sas peleas de unu pòpulu chi at seberadu finas sa gherra armada contra s’Otzidente pro fàghere aguantare sas ideas e sa terra sua.In finitia sa testimonia de sa delegatzione curda at fatu cumprèndere bene comente sa violèntzia contra a sa limba natzionale issoro dae parte de s’istadu turcu siat sa base de su colonialismu in ogni logu e in ogni cussòrgia. Ca perdende sa limba (unitària e iscolarizada) perdes su sinnu deretu de sa diferèntzia natzionale e duncas est prus in pigada a impulsare unu protzessu de soberania.
Leave a comment