Sa Sardigna fadigat a èssere “amiga” de sas generatziones noas. Segundu s’istùdiu “Youth Friendly 2025” de Confartigianadu, s’Ìsula est ùrtima in Itàlia pro sas oportunidades ofertat a sos giòvanos in su campu de s’impresa e de su traballu. Cun 403 puntos, contra a una mèdia natzionale de 579 e sos 709 de sa Lombardia, sa diferèntzia istruturale est funguda (- 30,3 pro chentu a paragone de sa mèdia).
S’anàlisi ponet in lughe problemàticas graes in su pilastru “Ocupatzione e dinàmicas giovaniles”, ue sa regione abbarrat a s’ùltimu postu natzionale. Pesant in manera negativa sa paga ocupatzione intre sos 15 e sos 34 annos, su nùmeru artu de NEET (chi no istùdiant nen traballant) e sas proietziones demogràficas chi ponent apretu pro sos 25 annos chi benint. Puru sos setores chi pertocant sa “istrutura produtiva” (16^ postu) e su “Capitale umanu e istrutzione” (17^) mustrant un’Ìsula cun s’alenu curtzu.
S’ùnica nota chi dat isperàntzia de aberu benit dae sa “Capatzidade amministrativa e inclusione territoriale”: inoghe sa Sardigna brincat a su de noe postos natzionales cun 660 puntos. Custu datu prèmiat sa bona resessida de sos servìtzios pro s’infàntzia, su raportu digitale cun sa PA (Amministratzione Pùblica) e sa capatzidade de pònnere in lìnia sa vida cun su traballu.
A livellu locale, Nùgoro nd’essit a campu comente sa provìntzia chi andat mègius (90^ natzionale), distinghende·si pro s’ànimu produtivu. A s’imbesse, Casteddu abbarrat in palas a s’ùltimu postu regionale (102^ subra 105), penalizada pròpiu dae sas dinàmicas de s’ocupatzione, mancari mantèngiat su primadu sardu pro sa calidade de s’istrutzione.
«S’Ìsula est marchende una lìnia pagu firma in mesu a debilesa e potentziale», at naradu Mattia Urru, presidente de sos Giòvanos Imprendidores de Confartigianadu Sardigna. Pro furriare sa diretzione, Urru pensat a sa netzessidade de interventos istruturales: abbertura a su crèditu, formatzione mirada e burocratzia in mancu.
Bobore Taras
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment