de Angelo Canu 
Papiros Editziones e sa Comuna de Irgoli presentant s’editzione 2014 de su prèmiu de giornalismu “Giuanne Frantziscu Pintore”, in ammentu de su grandu giornalista e iscritore, nàschidu in Irgoli in su 1939 e mortu in Nùgoro in su 2012.
In su bandu si dat a ischire chi su cuncursu iscadit su 30 de santandria e chi at a premiare tres artìculos iscritos in limba sarda cunforma sas normas ortogràficas e grammaticales seberadas dae sa Regione Sardigna (LSC) e dae autores finas a sos 45 annos de edade.
Sos artìculos depent èssere inèditos e depent tratare arresonos chi pertochent polìtica internatzionale relativa a sas natziones sena istadu, de informàtica e de turismu. 4200 caràteres pro istèrrere chistiones dìligas e de atualidade manna in custos tempos.
Semper in su bandu si dat a ischire chi nt a èssere premiados sos primos tres artìculos cun 200 € cada unu e cun sa publicatzione in sa rivista EJA.
Sas punnas de su prèmiu sunt paritzas: ammentare unu de sos prus mannos giornalistas sardos e forsis su prus importante de sos chi ant iscritu in sardu, promòvere sas normas ortogràficas de sa Regione sarda, ma fintzas sighire a mustrare chi in sardu si podet allegare fintzas de polìtica, turismu e informàtica.
Sa chistione est atuale meda si pensamus a sa polèmica fata sas dies coladas dae s’istòricu de s’Universidade de Tàtari Antonello Mattone chi at iscritu
“sono d’accordo con certe forme moderate di bilinguismo, ma la lezione universitaria in sardo la trovo controproducente e ridicola. Oggi non avrebbe alcun senso utilizzare il Sardo come linguaggio scientifico, giacché esso nelle sue due grandi varianti, campidanese e logudorese, è una lingua di fatto rurale, che ha assimilato solo indirettamente i termini più propriamente legati alla vita e alla cultura cittadina”
e chi at pesadu una rebellia manna in sa retza, fintzas cun artìculos de intelletuales de importu che a Frantziscu Casula chi ammentant a Mattone chi “In Sardu si podet narrere, iscriere e insegnare totu cantu”.
Inoghe podides lèghere su bandu intreu:
Bandu Prèmiu Pintore de giornalismu in sardu
Leave a comment