Pro un’atacu de coro est mortu a setantanoe annos Gigi Riva, sa ghia de su Casteddu chi at bìnchidu su campionadu italianu de fùbalu de su 1970. Un’òmine chi at barigadu su rolu istòricu tentu in cuss’istajone, ma chi est divènnidu un’eroe de sos sardos, pro prus de una resone.
Isse difatis at semper refudadu de tramudare màllia pro dinari, e sa Juventus nde l’aiant propostu meda, ma est semper abarradu in s’iscuadra sarda ca s’intendiat sardu de su totu. In ie at sinnadu prus de unu record. Ma non fiat petzi cussu, isse si fiat abigiadu chi giughiat una responsabilidade cun su pòpulu sardu: una luta pro s’orgògliu e pro essire dae s’umbra in ue l’aiant postu. Fintzas faeddende de s’annu chi aiant conchistadu s’iscudetu Riva mentovaiat sos istereòtipos chi corfaiant sos sardos, e chi custos l’ant dadu prus fortza e prus coràgiu in sas partidas.
Sa carriera de s’atacante tando s’intritzat cun sa cussèntzia de sos sardos in unu momentu istòricu delicadu. No ispantat tando sa proposta chi carchi grupu est fatende de nde bogare nùmene e istàtua de Caralu Felice dae su Cursu de Casteddu e a los cambiare cun unu monumentu e sa dèdica a Gigi Riva.
(redatzione)
Leave a comment