Dae su Black Power a su Black Lives Matter. Su ghenugru chi tocat s’erba birde de sos campos de fùbalu in custos europeos est unu gestu simbòlicu particulare chi in medas sunt cunfrontende·lu cun su pùngiu artziadu de Tommie Smith e John Carlos in Tzitade de Mèssicu su 1968. Unos cantos – a manca – sunt faghende paragones chi non sunt favorèvoles a sa protesta atuale ca diat pàrrere depotentziada cunforma a sa de sos tempos colados. “Fist up!” imbetzes de “Take a knee!”. Non t’inghenugres ma àrtzies su pùngiu! Comente chi su gestu de oe esseret unu “Procurade de moderare” 2.0. Si bi pensamus bene, su ghenugru a terra est finamentas malu a lu reprodùere graficamente, pro nàrrere. A bi lu bidides unu sìmbulu de partidu cun un’anca pinnigada? Cun unu pùngiu emmo. E fintzas in Sardigna bi l’amus àpidu: pensemus a Democrazia Proletaria Sarda. Tzertu, posca b’amus a sos che a Lukaku chi, non de s’inghenugrare ebbia, àrtziant finamentas su pùngiu. Ma no est custa sa chistione. Ca si cada borta nos limitamus a colare in su sedatzu unu gestu, un’immàgine, unu slogan, su perìgulu de no èssere a tretu de cumprèndere unu fenòmenu prus ampru est prus chi non reale. De giudu podet èssere s’iscumprou de sas reatziones in sos chi non cherent pigare unu disinnu craru cara a custa pesada-inghenugrada e in favore suo. Ca si finamentas unu gestu masedu che a custu ponet in crisi unas cantas entidades cheret nàrrere chi su tema de su ratzismu est galu privu de sa risposta chi bi diat dèghere. Paradigmàticu s’assentu de sa natzionale italiana chi finamentas a s’ùrtimu no ischiat ite fàghere in antis de su disafiu contra a s’Àustria e a pustis de sos chimbe inghenugrados contra a su Galles. Sa solutzione italiana l’amus connota: «Nos amus a inghenugrare si l’ant a fàghere sos aversàrios». At a èssere una solutzione chi ant a repìtere contra a sos de su Bèlgiu chi imbetzes (francu carchi sèberu repentinu) ant a sighire s’inghenugrare? L’amus a bìdere luego. Ma a dolu mannu custa ambiguidade no at a èssere tema de meledu in sa sotziedade italiana (e sardignola) autale: su chi contat est a cantare s’innu “siam pronti alla morte”, a si sinnare chirchende s’agiudu de deus e a bìnchere (trofeu e prèmiu de 250mìgia èuros). Cara a custa nèula, duncas, bene bèngiat su “Take a Knee”. Mègius si cun su pùngiu de Lukaku.
Màuru Piredda
Leave a comment