«Est ora de torrare a sas raighinas nostras in contu de libertade de espressione in Facebook e Instagram». Est su chi at naradu Mark Zuckerberg su 7 de ghennàrgiu in unu vìdeu dae issu etotu publicadu in su canale ufitziale Fb suo. Unu carignu a sos chi «non si podet nàrrere prus nudda!» cando lis ammentant sa potentzialidade ofensiva de su chi si narat.
Est una girada chi cumbinat cun sas mudadas polìticas in sos Istados unidos e no in cussos ebbia. «Sas eletziones reghentes – at naradu su boss de Meta – parent fintzas una furriada culturale pro dare torra prioridade a sa paràula».
Sa cosa cheret bida pro intreu: sa moderatzione chi amus connotu no est de sas mègius e bastat unu nudda pro bìdere unu «Custu cummentu diat pòdere violare sas règulas de Facebook» o unu «Nch’amus mòvidu unu de sos post tuos prus in bassu in su feed». Fintzas si sa publicatzione non paret un’afrenta.
Duncas, cale est sa solutzione a bisu de Zuckerberg? «In primis nos liberamus de sos controllores» («First, we’re going to get rid of fact-checkers»). Paret su «You’re fired!» de Donald Trump aplicadu a sas retes sotziales. In favore de ite? De «sas notas comunitàrias che a sas de X», est a nàrrere che a sas de s’amigu de Trump (est una cosa prus chi no istrana chi su cabu de una prataforma nàrgiat a craru chi cheret istòrchere dae sa cuncurrèntzia).
Fatu-fatu («Second…»), «semplificamus sas polìticas nostras» in contu de «immigratzione» e de «gènere» cando «non sunt in lìnia cun s’allega traditzionale». Un’àteru «to get rid» pro custas restritziones: «Chèrgio èssere seguru chi sa gente potzat cumpartzire sas ideas e sas esperièntzias suas in sas prataformas nostras».
Imbetzes de megiorare su chi non funtzionaiat bene, Zuckerberg nch’isperdet fintzas su tentativu cunformende·si a sa narratzione “noa”. E, a propòsitu de “nou” e de sas «raighinas» mentovadas, ammentemus·nos·lu comente naschet Facebook: cun sos utentes suos dende su votu a sas carenas de sas istudiantes de s’Universidade de Harvard.
Gianfranca Orunesu
Leave a comment