Fumada niedda

A pustis de s’Extra Omnes, sa fòrmula latina chi at acumpangiadu sa serrda de sas ghennas de sa Capella Sistina pro su comintzu ufitziale de su Conclave, b’at àpidu un’isetu longu de gente, ma totu cun grandu òrdine. De caos bi fiant petzi sos pugiones chi cada tantu si poniant subra de sa cobertura o de su columìngiu de s’aposentu nòdidu. In foras b’aiat 45mìgia persones lòmpidas a pratza de Santu Pedru mirende a cue. In intro b’aiat 133 cardinales chi, comente fiat sa previsione, a sa prima no ant agatadu su nùmene de unu de issos pro leare su logu lassadu vacante dae Frantziscu. In intro de cue ant iscurtadu sa meditatzione de su padre Raniero Cantalamessa, preigadore emèritu de sa Casa Pontifìtzia. Fatu fatu est comintzada sa preparatzione e sa distributzione de sas ischedas dae parte de sos tzerimonieris, s’estratzione a sorte de tres iscrutadores, de tres delegados a collire sos votos de sos cardinales martùrios, de tres revisores. In foras sa pratza fiat de milli colores (cun sas banderas de unos cantos paisos de su mundu e cun sos flash de màchinas fotogràficas e de telefoneddos) e de milli faeddos (su tempus de isetu fiat bastante mannu). Tres oras gosi, finas a cando no est arrivada sa fumada niedda: sos 133 porporados non sunt resèssidos a sa prima a elègere su de 267 pabas de sa crèsia catòlica e a sas ischeda brusiende in s’istufa vaticana b’an dèvidu annànghere percloradu de potàssiu, antràtzene e sùrfure pro chi sa fumada esseret niedda. Como tocat a cras: a sas 8 sa missa e sas làudes in sa Capella Paolina; a sas 9.15 pro resare s’ora mesana in sa Sistina e a concruos sas votatziones, sas primas. A pustis de àere pràndidu àteras votatziones dae sas 16.30 e su vèsperu de sas 19.30. Possìbile chi lu votent cras etotu. A bìdere istemus chie at a èssere su sutzessore de Frantziscu, e si at a èssere de sos suos.

mauro piredda