Nen sa Torres, nen su Casteddu ant coladu unu momentu lughente: resurtos malos, pagos puntos incungiados e punnas chi sunt galu totu de conchistare. Sa Torres est rennèssida a artziare sa conca eris, sa domìniga chi benit tocat a su Casteddu.
Sa Torres a pustis de sa pèrdida de su 2 de martzu contra a sa Ternana, segunda in classìfica, at àpidu una genia de imbadìngiu, comente chi apet saludadu de su totu sa possibilidade de lutare pro sa conca de sa sèrie. Sa bìnchida de sos umbros bènnida cun unu 3 a 1 craru paret apat istudadu sos isperos e s’interessu de sos tataresos a sighire bene s’istajone regulare. Sa resone fiat chi sos playoff e su logu prus bassu de su pòdiu pariant belle tzertos. Ma sa chida colada Torres e Pescara fiant cun su matessi puntègiu e s’arriscu de falare de una positzione at ischidadu s’iscuadra chi eris at bìnchidu contra a su Rìmini, torrende a si conchistare su logu. Sos playoff sunt un’àndala longa, matanosa e prena de arriscos: suprire tertzos o cuartos faghet sa diferèntzia, ca cheret nàrrere brincare una fase de girones e intrare deretos in sa fase natzionale: disafios a bogadura dereta e posca sa fase finale. Sa punna de sos tataresos como est cussa: amparare su logu cun totu sas fortzas chi ant.
Fintzas su Casteddu paret in crisi, ca in sas ùrtimas chimbe partidas at balangiadu petzi duos puntos. At pèrdidu cun sa Roma, su Bologna e sa Juventus e at paregiadu cun s’Atalanta e su Gènoa. Non fiant disafios simpres, ca semus faeddende de iscuadras totu cantas de sa parte prus arta de sa classìfica, francu su Gènoa, ma su Casteddu nos aiat avesadu a non si arrèndere nemmancu cara a sos mannos. Sa zona de perìgulu est a bator puntos e mancant galu noe dies de giogare mescamente cun àteras iscuadras in arriscu de falare a sa sèrie B, cun s’ispera chi sa pasada pro fàghere giogare s’Itàlia agiudes. Est craru però chi est como chi s’at a bìdere su caràtere de custu Casteddu.
Gabriele Tanda
Leave a comment