Itàlia 1 (Bonucci 66’)
Inghilterra 1 (Shaw 2’)
Rigores: Berardi, Bonucci, Bernardeschi (Itàlia); Kane, Maguire (Inghilterra)
Formatziones
Itàlia: Donnarumma, Di Lorenzo, Bonucci, Chiellini, Emerson (117’ Florenzi), Barella (54’ Cristante), Jorginho, Verratti (95’ Locatelli), Chiesa (85’ Bernardeschi), Immobile (54’ Berardi), Insigne (90’ Belotti). Allenadore Mancini
Inghilterra: Pickford, Walker (115’ Sancho), Stones, Maguire, Trippier (70’ Saka), Phillips, Rice (75’ Henderson, 115’ Rushford), Shaw, Mount (98’ Grealish), Sterling, Kane. Allenadore Southgate.
Àrbitru: Kuipers (Olanda)
Assistentes de lìnia: Van Roekel e Zeinstra (Olanda)
Su de bator òmines Del Cerro Grande (Ispagna)
Òmine Var Dankert (Germània)
Londra. Pùblicu inglesu fruschiende contra a s’innu italianu, ambas duas iscuadras inghenugradas contra a su ratzismu (ma pro initziativa de sos meres de domo) e abba fùrrida in su retàngulu grae de Wembley. Est comintzadu gasi su disafiu finale de su campionadu europeu de fùbalu intre Itàlia (campione su 1968) e Inghilterra (in cherta de su primu trofeu). Mancu colados duos minutos de giogu a pustis de su frùschiu de Kuipers s’Inghilterra marcat su vantàgiu suo: tiru traessu de Trippier, botza serbida dae Kane e Shaw chi befat a Donnarumma in su primu palu. S’Inghilterra sighit atzuda conca a sa ghenna aversària e abarrat atenta in difesa manigende su giogu pro amparare su resurtadu provisòriu. Kane dirigit su giogu e Trippier si mustrat malu a domare. Pagu cumpata s’Itàlia (istorbada de continu dae sos tifosos albiònicos in èstasi pro su 1-0) finamentas pro more de sas cunditziones de Jorginho e de sas mancàntzias de Barella e de Immobile. Ma a pustis de sa mesora sos biaitos custringhent a sos inglesos a si serrare in sa 3/4 issoro, mancari de badas: Insigne bi proat dae sos 20 metros. Pagos minutos a pustis est sa borta de Chiesa chi si lìberat dae Rice e iscudet ma imbolende·nche sa botza a manu dereta de sa porta. Gasi etotu sena profetu sa pressione italiana a concruos de su primu tempus: mancari unu possessu de botza a su 60% asulu perunu oriolu pro Pickford e pro sa difesa arba.
Sa ripresa comintzat cun sos matessi bintiduos giogadores, cun sa prima targhita groga (pro Barella a pustis de unu fallu contra a Kane) e cun Sterling a terra in àrea (cun sos cronistas Rai chi diant chèrrere s’ammonimentu pro simulatzione). A su de 50 minutos unu tiru lìberu de Insigne (a pustis de fallu de Sterling) nche bàrigat sa traessa. A su de 54 Sterling torra a terra: targhita groga pro Bonucci, tiru lìberu de Shaw e Maguire faddit de conca. S’Itàlia atacat a su de 61 Pickford parat unu tiru de Chiesa, prepotente a pustis de un’atzione personale sua, serente a su parègiu. Parègiu chi lompet a su de 66 cun Bonucci a pustis de su palu de Verratti. S’Itàlia, oramai dominende sa partida, est serente a su vantàgiu a su de 72 cun Berardi serbidu dae Bonucci. Chiesa a terra a pustis de unu cuntatu cando chi fiat giughende sa botza a in antis, ma abarrat in campu galu pro carchi munitu: Mancini nde lu bogat dae campu in càmbiu de Bernardeschi. A su de 83 minutos unu fallu de Insigne contra a Phillips cajonat sa de tres targhitas grogas: peruna duda pro Kuipers. S’Inghilterra bi torrat a proare cun Sterling, lestru, a su de 88: falat a fundu ma giogat sa botza barighende·nche sa lìnia. Sos ses minutos de recùperu non bastant pro nche giagarare sa prospetiva de sos suplementares: su tantu, però, de permìtere a Chiellini de iscudere a terra a Saka (tirende·li sa màllia). Òvia sa de bator targhitas grogas de Kuipers.
Suplementares: a chimbe minutos dae su comintzu Sterling buscat unu tiru dae su cugione e Phillips proat dae tesu in cherta de unu vantàgiu nou, ma iscudet a foras. A su de 98 bi proat Belotti ma Pickford parat a pustis de deviatzione. Pagos minutos a pustis sunt Grealish e Saka a non concrùere. Ocasione noa pro s’Itàlia a su de 102 minutos cun Emerson, Bernardeschi e Belotti cun Pickford chi sarbat sa porta. Sa partida s’isvilupat in intensidade cun ambas iscuadras in cherta de serrare sos contos in antis de sa loteria de sos rigores: Maguire a su de 105 impedit a s’Itàlia de ofèndere. Su segundu tempus comintzat cun su fallu de Maguire (ammonidu) contra a Belotti: tiru lìberu de Bernardeschi e Pickford parat in duos tempos. S’Inghilterra torrat atzuda custringhende s’Itàlia a su fallu: Jorginho ghetat a terra a Grealish e buscat una targhita groga; su tiru lìberu de Phillips non ponet oriolos a Donnarumma. A pustis de una cantas atziones Kuipers decretat sa fine de sos suplementares.
Rigores: Marcant deretu Berardi e Kane ma Pickford parat su rigore de Belotti. Vantàgiu inglesu cun Maguire. Bonucci parègiat sos contos, finamentas gràtzias a su palu de Rashford. Marcat Bernardeschi ma Sancho iscudet a su palu. A Jorginho bi la parat Pikford ma Donnarumma parat a Saka. Itàlia campionde de Europa.
Leave a comment