Foto leada dae it.uefa.com
In s’isparègiu pro su mundiale de fùbalu de ocannu, giogadu in Zenica su 31 de martzu, sa Bòsnia at eliminadu a s’Itàlia. A pustis de s’1-1 in sos tempos regulamentares, cun retes de Kean e Tabakovic (in sa foto), est finida a sos tiros de rigore, cun bator de bator realizados dae sa Bòsnia, cun Tahirovic, Tabakovic, Alajbegovic e Bajraktarevic e unu ebbia dae s’Itàlia cun Tonali e faddinas de Esposito e Cristante. Est una derrota istòrica pro sos italianos, chi abarrant foras de sa Copa de su Mundu pro sa de tres bortas a fila a pare, cosa mai capitada in antis a un’iscuadra chi at bintu nessi unu tìtulu mundiale.
A s’àtera ala ddoe fiat una de sas natzionales nàschidas a pustis de sa dissolutzione de sa Jugoslàvia. Sas gherras tziviles e interètnicas chi at marturiadu su paisu de sos balcanos in sos annos ’90 at partizìdu s’istadu dae unu puntu de bista polìticu e isportivu puru.
Sa Bòsnia est unu de sos resurtados de cuddu protzessu. Sa prus multiètnica de sas natziones de sa ex Jugoslàvia, bida sa presèntzia, a intro de sa majoria bosgnaca de religione islàmica, de minorias mannas de croatos e serbos, at patidu, forsis prus de sas àteras partes de sa ex federatzione e pròpiu pro sa cumpositzione sua, un’emigratzione fortzada in sos primos annos ‘90.
Su ligàmene cun sa pàtria però non s’est mai truncadu e sa natzionale de fùbalu de sa Bòsnia ddu dimustrat.
Intre sos giogadores impignados eris ddoe nd’aiat bator nàschidos in Germània: su difensore Kolasinac de s’Atalanata, Demirovic, atacante de s’Istocarda, Alajbegovic, atacante de su Salisburgu e Burnic, abarradu in panchina, tzentrucampista de su Karlsruhe.
In prus ddoe fiant s’atacante de su Borussia Moenchengladbach Tabakovic, nàschidu in Isvìtzera, su portieri Hadzikic, nàschidu in Àustria, su difensore de su Benfica Dedic, nàschidu in Olanda, su tzentrucampista de s’Hull City Hadziahmetovic, nàschidu in Danimarca e su tzentrucampista de su Young Boys Gigovic, nàschidu in Isvètzia.
S’eroe de sa partida est istadu Bajraktarevic, nàschidu e pesadu in sos Istados Unidos, atacante de su PSV Eindoven. Mutidu su “Messi de Milwuakee”, est issu chi at marcadu su rigore detzisivu chi dd’at a permìtere de giogare su mundiale cun sa natzione sua de apartenèntzia in cudda in ue est nàschidu.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment