CASTEDDU – Non est bastada sa voluntade, non sunt bastados s’abbolotu e s’agiudu de sa tifoseria in una Unipol Domus prena a machine. Su Casteddu est rutu suta a sos corfos de unu Como tostu e fritu, chi si nche torrat a domo a puntos prenos gràtzias a sas retes de Baturina e Da Cunha. Pro sos òmines de Pisacane est istada una derruta fea, chi brùsiat pròpiu in su momentu chi pariat premiare sos sardos.
Su cumintzu est totu a favore de sos lumbardos. Sos giogadores de su Casteddu sunt pesosos, cancarados forsis pro more de s’importu de sa gara. A su de batòrdighi minutos, sos istràngios sunt in antis pro una faddina defensiva: Baturina s’apròfitat de unu tretu de àrea lassadu solu e carràrgiat de astrau a Caprile. Est rete. Su primu tempus colat in mesu a sos frùschios de su pùblicu chi diat chèrrere prus atza, cun sos sardos chi fadìgant a dare caddos a sas puntas.
In su segundu tempus sa mùsica mudat. Pisacane iscòntriat sos suos e su Casteddu torrat a giogare a bae in buca. Sa pressione crèschet e a su de 56 minutos sa Domus s’allughet in una boghe corale: cross de Palestra pintadu a pinzellu, passazu de Obert e corfu de conca de Sebastiano Esposito chi nche colat a rete. Est s’1-1 chi paret su cumintzu de una bortada èpica. Sos ruji-biaitos catzigant su Como a s’àla sua, ma fadigant a agatare su mùidu finale.
A su de 76 minutos, in su momentu prus bellu pro su Casteddu, Lucas Da Cunha agatat su corfu de sa domìniga. Unu tiru mancu dae binti metros arribat che un’istagnale de abba frita in cùcuru: si nche inferchet in ue Caprile non podet arribare. S’atrivida finale, ghiada dae Adopo e dae sos tiros de Dossena, s’iscudet a sos guantes de Butez a chimbe minutos dae sos congruos.
Su Casteddu essit dae su campu a conca arta ma cun puntos nudda. Sa classìfica abbarrat pro como intro a oros de seguresa, ma sas iscuadras in segus sunt pongende fatu e su tretu pro faddire si nch’incùrtziat. Restat su giogu bonu bidu in su segundu tempus, ma sas faddinas defensivas contra a giogadores de custu livellu si pagant.
Bobore Taras
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment