Su capu criminale de Haiti Jimmy Cherisier, alias Barbecue, est galu lìberu. Un’operatzione de sa politzia natzionale no est bàlida a dd’arrestare ca s’ex politziotu e como lider de sa banda Viv Ansanm nch’est resurtadu a si nche fuire.
Sa temporada de violèntzia, cumintzada in su 2021, no at sessadu mancu a pustis de sa nòmina de su primu ministru ad interim . In sas ùrtimas duas chidas de santandria in sa capitale Port-au-Prince ant mortu a unas 150 persones. Àteras 20.000 si nche sunt andadas, bidu ca sa tzitade est belle totu suta su controllu de sos criminales. Ocannu su contu de sos mortos male est lòmpidu giai a unos 5.000.
A custa tragèdia si nd’agiunghet un’àtera. Difatis segundu s’Unicef sa metade de sos chi faghent parte de sas bandas armadas sunt minores de edade. Sos pitzinnos bivent inghiriados dae violèntzia e delincuèntzia e a bortas si arruolant in sas milìtzias paramilitares pro tènnere carchi cosa de dare sa sas famìllias. Ocannu, semper segundu s’agentzia de s’ONU, su nùmeru de pitzocheddos intrados in sas bandas criminales est crèschidu de su 70%.
Sa situatzione in sa capitale est de gasi mala chi pròpiu s’ONU at detzìdidu de ritirare su personale suo. S’evacuatzione est andende a in antis in elicòteru chi nche leat 14 persones ogna biàgiu. Custu ca finas s’aeroportu est serradu a pustis chi ant isparadu a unos cantos aparèchios chi fiant aterrende o partende dae sa pista.
Criminale, politziotos e populatzione tzivile s’atzufant a pare armados a chie de mitra e a chie de machete.
In s’ìnteri àteras organizatziones non guvernativas, che a Mèigos sena Fronteras, sunt pensende de lassare Haiti.
Sos Istados Unidos, dae parte issoro, sunt leende·nche su prus de su personale de s’ambasciada, lassende ebbia su tantu de gente indispensàbile.
Pro como s’ONU non lassat s’istadu. Su personale s’est cambiadu a s’ala nord de su paisu.
(gianni muroni)