Sas eletziones munitzipales frantzesas de su 15 e de su 22 martzu non sunt prus unu disafiu amministrativu pro su controllu de sos Comunes. S’acontèssida de Quentin Deranque, su militante de dereta estrema mortu a carches e a pùngios in Lione pagas dies a como, at trasformadu sa campagna eletorale in unu referendum in contu de seguridade e de violèntzia polìtica, cajonende in su paisu a unu clima de tensione inèditu. Custos avenimentos sunt determinende carchi problema in su Fronte populare nou (Nfp) de Jean-Luc Mélenchon, sende chi sos acusados de àere mortu a Deranque nant chi nche sunt a s’ala de sa France insoumise. Su panorama polìticu, comente amus giai bidu, si presentat tripolarizadu, ma cun dinàmicas noas in intro de sas coalitziones. A manca s’obietivu est de mantènnere sas bastidas de Parigi, Lione e Marsìllia, ma su Nfp est assachiadu bantzighende·si intre polìtica e crònaca e sos sotzialistas (parte de s’alleàntzia cun comunistas, ecologistas, republicanos e sos de sa France insoumise) sunt marchende sas distàntzias pro evitare una mèngua de sos cunsensos issoro chi movent dae un’eletoradu prus moderadu. Su blocu macronianu est finas issu in crisi, cunforma a sos sondàgios locales, ma como su tzentru est puntende totu sas pedinas suas in sa retòrica de s’òrdine republicanu: su ministru Gérald Darmanin est de sos prus chi est cavalchende s’unda emotiva pro ghetare sas neghes a sa manca radicale e pro recuperare votos a dereta. Mancu a lu nàrrere, sos mègius candidados a isfrutare sa situatzione sunt sos de Le Pen e Bardella chi punnant a conchistare unu nùmeru record de munitzìpios presentende·si comente s’ùnicu àrgine. S’eletoradu cunservadore, in intro de una tendèntzia continentale chi mirat a dereta, at a fàghere pro seguru sa diferèntzia, custu giru, antitzipende una tendèntzia chi, cun probabilidade manna, s’at a cunfirmare pro sas presidentziales de annoas.
mauro piredda (foto elina sazonova)
Leave a comment