K2-18b est un’esopianeta cugugiadu dae un’otzèanu istremenadu ‘prenu de vida’ cun una seguresa de su 99,7 pro chentu. Un’iscuadra de astrònomos de s’ Universidade de Cambridge at imbènnidu sas orminas chìmicas de sinnos possìbiles de vida in unu pianeta chi s’agatat in foras de su sistema solare. Impitende datos de su Telescòpiu Ispatziale James Webb (JWST), issos ant identificadu sas molèculas sùlfuru de dimetilu (DMS) e/o disùlfuru de dimetilu (DMDS) in s’atmosfera de custu esopianeta chi òrbitat in intro de sa zona abitàbile de s’isteddu suo. In sa Terra custas molèculas petzi las produint sos organismos bios, mescamente microorganismos marinos comente su fitoplancton. Mancari siat possìbile chi unu protzessu chìmicu disconnotu siat in palas de sa presèntzia de cussas sustàntzias in K2-18b, custos resurtados rapresentant sa proa prus manna finas a oe de su fatu chi diat pòdere esìstere sa vida in unu pianeta in foras de su sistema solare.
Sas osservatziones ant logradu unu gradu de sinnificatividade istatìstica de tres sigma, chi inditat una probabilidade de su 0,3% ebbia chi totu custu siat produidu dae una casualidade.
Pro nàrrere chi b’at àpidu un’iscoberta sientìfica, tocat de lòmpere a su limenàrgiu de chimbe sigma, parìvile a una probabilidade inferiore a su 0,00006% chi su resurtadu siat fortùitu.
De seguru no at a èssere possìbile a averiguare sa cosa in pessone: K2-18b s’agatat a 124 annos lughe dae sa Terra, una distàntzia chi bi diant chèrrere 187.000 annos pro bi lòmpere cun unu naviu ispatziale.
