A s’inghitzu pariat chi petzi nois sardos aìamus sos fogos e sos padentes chi mudaiant in chìnisa, nois e sa neghe nostra de contivigiare belle e pagu su logu e cun sa neghe de fartare de sentidu tzìvicu. Pustis a pagu si sunt allutos fogos in Grètzia, in Sitzìlia, in Calàbria e posca est nàschidu e crèschidu unu fogu de duamìgia ètaros in Rùssia, sena contare àteros logos de Europa.
Sa veridade est chi su mundu tenet sa frebba arta, su calore de sas dies coladas no est prus un’acontèssida rara, ma giai dae carchi annu dae como barigare sos baranta grados in istiu est normale, comente sos bentos chi batint dae s’Àfrica a s’ispissu rena e sicumine. Su clima est mudende, e si calicunu aiat carchi duda, su chi est capitende in custa ùrtima croba de annos los ant bogados totus. Chie sighit a nàrrere chi pertocat sa natura de su mundu, comente sas glaciatziones, non ischit chi mai càmbiu de clima perunu est istadu gasi lestru.
Sa relata de su Intergovernmental Panel on Climate Change, (inoghe) ammustrat chi si non si arressat sa crèschida de su luòngiu e de sa CO2 in s’àera, s’arriscu mannu est chi non si potzat torrare a dae segus e a s’agabbu de su sèculu animales, prantas e màndigu chi connoschimus ant a iscumpàrrere e mescamente tretos mannos de su mundu ant a devènnere desertu o cun temperaduras gasi artas dae non pòdere èssere abitadas dae s’òmine.
Cambiare su mundu pertocat a totus, ma non lu podimus fàghere si non inghitzamus dae nois etotu. Su cumportamentu de cada persone est de importu, ma bisòngiat de traballare pro amparare de prus su logu nostru, sa Sardigna, e pro sanare sas fertas chi tenet s’ambiente suo. Ca si est beru chi nemos si sarvat dae isse, est beru fintzas chi onniune depet fàghere su pròpiu.
(redatzione)
Leave a comment