Bator sunt is candidados a sìndigu chi is eletores nugoresos ant a agatare in s’ischeda eletorale s’8 e su 9 de làmpadas. Comente aìamus giai iscritu su disafiu prus mannu est su chi b’est intre su campu largu de Emiliano Fenu e s’alleàntzia de tzentru-dereta ghiada dae Giuseppe Luigi Cucca. Is àteros duos sunt Lisetta Bidoni (chi torrat a propònnere su “Progetto per Nuoro”) e Domenico Mele (cun is candidados de Democrazia sovrana e popolare, sa formatzione de Marco Rizzo). Sa presentatzione de sas listas est comintzada eris e nche l’ant finida oe a mesudie. Cun Fenu bi sunt su Movimentu 5 isteddos (cun 21 candidados), s’alleàntzia Birdes e Sinistra (20), Uniti Emiliano Fenu sindaco (23), Sinistra futura (20), Riformisti per Nuoro (24), Psi (22), sa bitzicleta Progressisti-Liberu (18). Cun Cucca bi sunt sa lista personale sua (cun 24 candidados), Forza Nuoro al centro (24), SìAmo Nuoro (18), Cambiamo Nuoro ora (19), Psd’Az (18) e Riformiamo Nuoro (20). Bidoni e Mele current cun 24 e 16 candidados. In Nùgoro, su mese de maju de s’annu coladu, est finida s’esperièntzia de sa Giunta ghiada dae Andrea Soddu (chi pagos meses in antis fiat candidadu a sas regionales cun Renato Soru). Tando, cun 13 votos contràrios e petzi 11 favorèvoles, su Cussìgiu no aproveit su bilàntziu de previsione. Tocat de bìdere si b’at a àere chie binchet a su primu turnu o si at a tocare una consultatzione noa 15 dies a pustis. Su 2020 custos fiant sos resurtados: Andrea Soddu (listas tzìvicas) cun su 28,8%; Pietro Sanna (tzentru dereta) cun su 24,4%; Carlo Prevosto (tzentru manca) cun s’11,6%; Lisetta Bidoni (manca) cun su 10,6%; Ciriaco Offeddu (listas tzìvicas) cun su 9,6%; Francesco Guccini (listas tzìvicas) cun s’8,8%; Alessandro Murgia (M5s) cun su 6,1%. Soddu bincheit in su ballotàgiu.
Leave a comment