Sos de sa Pro Loco de Tiesi torrant a “Sa domo de Don Zusepinu”, sa dimora nobiliare antiga de sos Garaos in carrera de Breta, cun una mustra noa issoro. S’apuntamentu (intrende·nche dae carrera de Sulis) est pro totu custa chida e mescamente pro sàbadu su 13 de ghennàrgiu, in intro de sa die de sa manifestatzione culturale e enogastronòmica “Rochitas in festa” promòvida dae s’amministratzione comunale.
Custa borta sos protagonistas ant a èssere sas criaduras de su tempus coladu, o mègius, sos bestireddos issoro. “Fascas, cossitos e caretas”, custu est su tìtulu de s’espositzione in contu de pìngios infantiles dae su 1886 a su 1960. Unu tempus de belle bìndighi lustros chi at a èssere contadu in òrdine cronològicu pro mèdiu de camissolas, fascas, coberteddas, pannos, caretas, cossitos, mantellas de batijare e àteros pìngios de grandu valore culturale e istòricu in unu cuntestu de mobìlias e trastes antigos.
«Sa mustra – narant sos cumponentes de sa Pro Loco tiesina – cheret bogare a campu finamentas s’abilidade, sa passèntzia e sas cumpetèntzias de sas ricamadoras de professione o de cussas fèminas chi si poniant solas a sestare sos bestireddos pro una die nòdida o pro cada die».
Sa mustra l’ant aberta a su pùblicu dae su 17 de nadale cun oràriu serantinu (custa chida dae sas chimbe a sas ses e mesu), cun paritzos bisitadores lòmpidos pro ammirare su chi poniant a sos pitzinnos de concruos de s’otighentos e de sos primos 60 annos de su sèculu coladu. Pro more de custa resèssida sos promotores ant disinnadu de programmare una sessione noa de bìsitas ghiadas in sa data de “Rochitas”, dae sas 11 de mangianu, cun sos espertos de su campu prontos a acumpangiare sos chi b’ant a bènnere pro dare ondras a s’arte de unu tempus.
De prus, semper su die de sàbadu su 13, in sa coghina de sa domo, unas cantas fèminas ant a ammustrare s’ammàniu de sos macarrones a ferritu.
Sa faina nch’est in intro de sas punnas de sa Pro Loco chi in Tiesi acumprit a sa funtzione de recùperu de su patrimòniu culturale, linguìsticu, naturale, paesagìsticu e monumentale locale pro mèdiu de una sèrie de publicatziones e atividades. Atividades bene collidas in su situ sabertula.it nàschidu dae s’esigèntzia de mustrare e de pònnere a disponimentu de chie si siat un’archìviu de immàgines, testos, vìdeos e chircas.
Sa mustra “Fascas, cossitos e caretas” est sa de bator espositziones chi sa Pro Loco (cun su grupu atuale chi est nàschidu su 2002) organizat in “Sa domo de Don Zusepinu”. S’apuntamentu rinnovadu est duncas pro custa chida dae sas 17 a sas 18.30 e pro sàbadu su 13 de ghennàrgiu, intrende·nche dae carrera de Sulis, dae sas 11 a sas 18.