«Bisogna tutelare famiglie e imprese». Est sa fràsia forsis sa prus pronuntziada dae belle totus sos atores intre sos si cherent votados intro sas 11 de custu note. Che chi aerent mudadu su primu artìculu de sa Costitutzione («L’Italia è una Repubblica democratica fondata sulle famiglie e sulle imprese»). Pro seguru est una fràsia chi calicunu at naradu pensende a sas famìlias de traballadores o a sas impresas minudas chi sunt sufrende crisi grae cando chi su grandu capitale mancu nde connoschet. Bene finamentas a l’ischire chi su raportu intre «famiglie e imprese» est un’indicadore in sas allegas econòmicas. Ma est craru finamentas chi, in sas allegas polìticas, si unu faeddat de «famiglie e imprese» ebbia, che chi non b’aeret diferèntzia intre sas unas e intre sas àteras, s’arresonu est prus chi no interclassista. «Siamo tutti nella stessa barca?». Ma nono! Pro nàrrere, si una famìlia est reale che a sa de sos Windsor, finas su reberde de domo est a tretu de nos nàrrere «de lassare su traballu, si nos dat tristura». Est chi non totus sos cristianos de sas àteras famìlias sunt a tretu de lu lassare, semper chi lu tèngiant. Posca b’at unu meme in ue su duca de Sussex nos cussìgiat sa còmpora de unu yacht. Si est fake est contu galanu. Si no est fake…eh no…no istamus totus cantos «nella stessa barca». Pro custu esempru amus pigadu s’Eurotunnel conca a Londra, ma est fàtzile fàtzile pro chi su contu lu potzamus acrare finas inoghe. E sas impresas? Bi sunt sas minudas chi non resessint a bi la sighire cun su traballu pro more de sos gastos energèticos, bi sunt sas chi si sunt lamentende como de sos gastos ma non fiant interessadas a sos gastos de chie lis fruniat sa matèria prima a su preju «fissato dal mercato» (est fàtzile fàtzile custa) e bi sunt sas chi faghent extraprofetos. Sa matessi barca inoghe puru? Nono. Sos traballadores, ismentigados in custa narratzione, ant a èssere chircados dae cras, a pòddighe puntadu, cun sa neghe issoro de àere votadu a dereta o a sos chi nd’ant ghetadu a terra a Mario Draghi.
màuru piredda
Leave a comment