Exxon est unu de sos prus mannos produtores de petròliu de su mundu e de sos responsàbiles de sos problemas de su clima chi semus bivende a die de oe e s’acusa no est prus unu parre de carchi ambientalista. Difatis, un’istùdiu fatu in paris dae s’Universidade de Harvard e de Potsdam e publicadu in «Science», una, si non sa, rivista iscientìfica prus de importu de su mundu, analizat sas chircas internas de sa Exxon a subra de su luòngiu e de sas conseguèntzias suas.
S’artìculu iscumproa chi sa cumpannia petrolìfera ischiat in manera crara ite fiat faghende e ite podiat capitare. In sos annos Setanta Exxon aiat finantziadu chircas a subra de sos efetos de s’impreu de massa de sos combustìbiles fòssiles e sos resurtos, chi sunt s’ogetu de s’istùdiu nou publicadu in «Science», sunt craros: sa cantidade crìtica de petròliu consumadu e sa crèschida de sas temperaduras sunt cussas chi sunt cumprendende e timende sos climatòlogos dae carchi annu, fintzas su momentu de s’inghitzu de sos efetos visìbiles in su mundu est giusta. Custu istùdiu cunfronta fintzas sos resurtos de custas chircas cun sos datos chi ant postu su primu pidinu a sos iscientziados. Exxon teniat informatziones prus pretzisas de cussas chi ant mòvidos sas prima cuntierras a subra de su clima.
Exxon ischiat bene e mègius de sos iscientziados in ue fiat batende su mundu, ma non at fatu nudda pro arressare su protzessu. Antzis at negadu cale si siat raportu intre su clima e sos combustìbiles fòssiles e at atacadu chie aiat iscoviadu a sos mèdia su perìgulu de su luòngiu.
(redatzione)
Leave a comment