Sunt duas sas pratzas de su 15 martzu. Sa prima la connoschimus dae sas dies coladas e naschet dae un’apellu istèrridu dae Michele Serra in sas pàginas de Repubblica. In cussas rigas su giornalista at postu sa pregonta: «Si sas autocratzias faeddant cun semplitzidade e a craru, cale limbàgiu diat dèvere adotare s’Europa a tales chi sa boghe sua si potzat intèndere cantu a sa de is inimigos suos?».
Su limbàgiu de sas armas, pro nàrrere, est su chi sunt aprontende in Bruxelles cun 800 milliardos de èuros de nde bogare a sas garantzias sotziales. E cussu limbàgiu l’agatamus finamentas in su para bellum de Antonio Scurati, semper in Repubblica: «Dae Maratona a su Piave – at iscritu s’autore de sa cuadrilogia “M” dedicada a Mussolini – sos europeos ant gherradu (e bìvidu) fideles a su contu chi nd’ant fatu de sa batalla (e de sa vida) issoro. Dae Omeru a Ernst Jünger sa tziviltade nostra at pensadu a sa cumbata armada frontale e detzisiva comente fundamentu pròpiu ca in sa gherra eròica at agatadu s’esperièntzia prenària, s’acontèssida fatìdica, su momentu de sa veridade dae ue sunt nàschidas sas formas de sa polìtica e sos valores de sa sotziedade, in ue si sunt detzisos sos destinos individuales e colletivos».
Ma b’at chie pro su 15 de martzu nd’est aprontende un’àtera de manifestatzione, movende dae sas paràulas de su presidente partigianu de sa Repùblica Sandro Pertini, «isboidare sos arsenales, prenare sos granales». «S’Europa – leghimus – est giai destinende 360 milliardos a s’annu pro sos gastos militares» e como «at a atacare de prus s’istadu sotziale». Cales sunt sa cunsighèntzias tìmidas? «A su malèssere sotziale ant a rispòndere cun sa repressione de su decretu seguresa. Su finantziamentu de s’ispesa militare l’ant a sufrire sos tretos de su paisu comente su meridione. Sa virilidade de sa gherra at a andare a manu tenta cun su patriarcadu». Ite fàghere, tando? «S’Europa diat dèvere pigare un’initziativa che a sa de Helsinki pro garantire su disarmu, sa paghe e sa seguresa comune in su continente nostru».
Leave a comment