De s’Einstein Telescope ischimus galu pagu. Sas allegas peri sos logos, fìsicos o virtuales chi siant, non sunt galu bene sestadas: b’at chie b’est bidende un’oportunidade sena nde connòschere s’argumentu; b’at chie a suta limba est chirchende de li nàrrere chi nono sena b’àere postu totu sos tassellos de s’arresonu contràriu. Pro seguru b’at a chèrrere carchi àtera cosighedda pro pòdere àere in Sardigna un’àteru chistionu polarizadu. S’allega chi iscriimus inoghe pertocat però su veìculu linguìsticu, sende chi de Covid, Ucraina e de rodabbentos nd’amus faeddadu belle semper in italianu. Finas pro su cammellu Rodolfo de Ovodda amus seberadu (in prosa e in versos) sa limba de Dante. Baddu duncas si finamentas pro s’ET amus a fàghere su matessi. Ca est inoghe chi intrat in giogu s’Istitutu italianu de fìsica nucleare Infn. E lu leghimus in su post de s’assessora regionale de s’Istrutzione pùblica Ilaria Portas: «S’Istitutu Natzionale de Fìsica Nucleare (INFN) difatis at fatu ischire a sa Regione Sardigna, Servìtziu Limba e Cultura sarda, chi bolet unu’agiudu pro iscrìere in limba sarda: custu at a serbire pro ammaniare una setzione noa de su giassu istitutzionale. S’Assessora de s’Istrutzione Pùblica, Benes Culturales, Informatzione, Ispetàculu e Isport, Ilaria Portas at propostu cun una delìbera, aprovada dae sa Giunta regionale, de sighire cun su progetu gràtzias a s’agiudu de su Isportellu Linguìsticu regionale (SLR)». Non nos ispantat chi s’assessora apat iscritu su post in sardu, fintzas ca fiat forsis s’ùnica candidada chi in sa tribuna eletorale de sa Rai s’est posta a faeddare cun sa limba nostra acollende s’invitu de Assemblea Natzionale Sarda. Ma como sa riflessione est custa: in antis de nàrrere chi s’impreu de sa limba siat unu tentativu pro nch’ingurtire mègius s’ET cheret chi fintzas nois comintzemus a contare custas chistiones in sardu. O no?
mauro piredda
Leave a comment