Fintzas ocannu est essida a campu sa classìfica de sa calidade de sa vida a incuru de su Sole24Ore (incarca inoghe pro la compidare). Sa classìfica est partzida in tres: una pro sos pitzinnos, una pro sos giòvanos e una pro sos sèneghes. Sa Sardigna est posta bene meda, francu in cussa pro sos giòvanos. Casteddu est sa mègius provìntzia de totu s’Istadu pro sa calidade de sa vida de sos antzianos, mescamente pro more de sos ìnditzes artos meda pro cantidade de mèigos ispetzialistas, ispera de vida, infermieris, ma totu su chi pertocat sa sanidade est de calidade arta meda. In sa classìfica de sa calidade de vida de sos betzos agatamus in subra belle totus sas provìntzias sardas: Nùgoro est sa de chimbe, Tàtari sa de ùndighi e Aristanis sa de dòighi. Custu acontesset pro more de su consumu de meighinas pro sas maladias crònicas, chi est in sa mèdia bassu, e pro s’assistèntzia in domo, chi est arta. Su Sud Sardigna, a s’imbesse, est in sa positzione otantaghimbe cun nùmeros malos de mèigos ispetzialistas e su nùmeru peus de totu s’Istadu pro sos infermieris.
Semper su Sud Sardigna est s’ùrtima provìntzia in sa classìfica pro sos giòvanos, cun petzi tres ìnditzes a subra de sa meidade de sa classìfica: sa cantidade de bar, sos amministradores a suta de sos baranta annos e sos laureados. Custu ìnditze est unu de sos peus in Sardigna cun Tàtari e Aristanis chi sunt in coa de sos laureados in s’Istadu intreu, s’ùnica chi si sarvat est Casteddu, chi at prus laureados medas. Sa provìntzia chi oferit de prus a sos giòvanos in s’ìsula nostra est Nùgoro chi bàrigat fintzas sa meidade de sa classìfica: tenet sos livellos de imprendidores e de disocupatzione de sos mègius e tenet tzilleris medas, ma fintzas amministradore giòvanos.
Pro sa calidade de sa vida pro sos pitzinnos sa provìntzia posta mègius est Aristanis cun su giassu oto de sa classìfica. Però totu sa Sardigna est unu logu bonu pro èssere pitzinneddos: francu Tàtari totu sas provìntzias sunt in artu in sa classìfica. Su pro ite pertocat sos servìtzios in s’iscola, ma custu pro more de sa paga gente chi b’at inoghe e su birde pùblicu. Àtera cosa de importu chi b’at meda in Sardigna sunt sos pediatras, Casteddu est sa prima in s’Istadu intreu e sos àteros tretos sunt in sa parte arta de sa classìfica.
(redatzione)
Leave a comment