«Est ora!». Irs e ProgReS Torra in paghe

Proas de unidade in s’indipendentismu sardu bi nd’at àpidu diferentes sos annos colados: de màdrighe eletorale (Sa Mesa de su 1999, Sardegna libera su 2004, Unidade indipendentista su 2009, Fronte indipendentista unidu e Sardegna possibile su 2014, Autodeterminatzione e Sardi liberi su 2018); de proposta polìtica prus ampra (Cunvergèntzia indipendentista su 2011); de unidade populare e sotziale (Consulta rivolutzionària sarda su 2012); assembleare (Ans su 2019); de amministradores (sa Corona de Logu su 2018). Como bi nd’at un’àtera, ma cheret chi l’abbaidemus movende dae su primu deghènniu de sos 2000. Irs, parte interessada de su chi semus contende, at cùrridu in solitària su 2004 e su 2009 refudende cale si siat alleàntzia, ma su 2014 disinneit de nch’intrare a sa coalitzione de tzentru manca. Alleadu cun Pigliaru finamentas s’ex Irs Franciscu Sedda chi però, pagu tempus in antis, si nche fiat essidu dae sos àteros ex Irs de ProgReS. Sedda a banda, ex Pds de Maninchedda e como in s’assòtziu suo A innantis, Irs e ProgReS sunt torrende a militare paris e in pare cun Torra!, assòtziu de indipendentistas sena tèssera. A su presente no est unu cartellu eletorale, finamentas ca non b’at votatzione in vista. Unu comintzu de caminu, duncas, est, e su blog Helis est su medium pro projetare custa unidade dae sa rete. Oe sos ativistas si sunt atopados in tretos de Marrùbiu narende·si e narende·nos “Est ora” e mustrende comente sìmbulu una broca acontzada. Intervènnidos a sa cunferèntzia Franciscu Pala, unu intre sos fundadores de Irs («Cunsignamus a sa natzione sarda sas istòrias nostras, sas boghes nostras e sas carenas nostras»), Adriano Sollai de ProgReS («Oe no ischimus a ue nos nch’at a giùghere custa elaboratzione, ma sa punna nostra est sa de dare forma a una comunidade polìtica»), Edoardo Figus de Torra! («Ponimus a disponimentu de sa càusa indipendentista capatzidades isvilupadas in s’ativismu») e Simone Maulu de Irs («Petzi aberende una fase istòrica noa amus a pòdere torrare a cumpònnere un’àrea indipendentista»). Sas tres fortzas polìticas si sunt indiritzadas a sos sardos de Sardigna e de su disterru «pro chi abbàident cun atentzione a s’initziativa e a su protzessu in pessu comintzadu». S’oferta polìtica l’ant descrita de custa manera: «internatzionalista, euromediterrànea, ecologista, nonviolenta e antirazzista». Su tempus e sas acontèssidas nos ant a mustrare si custa est una torrada a bachile o un’istèrrida de una unidade prus ampra.

Màuru Piredda