Su 20 de làmpadas Imanol Pradales at otènnidu s’investidura, in su parlamentu bascu, a lehendakari, est a nàrrere presidente de su guvernu de sos Paisos Bascos.
Pradales, esponente de su Partidu Natzionalista Bascu, at leadu 39 votos contra a sos 27 de Pello Otxandiano.
A votare pro su lehendakari elègidu sunt istados, a prus de sos natzionalistas, sos sotzialistas. Pro s’àteru candidadu at votadu su grupu suo ebbia, est a nàrrere Euskal Herria Bildu, s’alleàntzia de sa manca indipendentista.
S’acòrdiu intre natzionalistas e sotzialistas no est una novidade: est sa de tres legisladuras a fila a pare cun custa alleàntzia de guvernu.
Su PNV (Partido Nacionalista Vasco), cun 27 iscannos, e su Partidu Sotzialista, cun 12, ant duncas formadu una coalitzione guvernativa. A s’opositzione ddoe sunt sos de EH Bildu, su Partidu Populare, cun 7 iscannos, Sumar, movimentu de manca, cun un’iscannu, e Vox, partidu de destra, cun un’iscannu etotu.
Custa est sa cumpositzione de su parlamentu de Vitòria chi est essida a pìgiu dae sas eletziones locales de su 21 de abrile.
A pustis de s’investitura in parlamentu, su 22 de làmpadas Pradales at fatu su giuramentu comente lehendakari, segundu sa traditzione, a suta de s’Àrbore de Guernica, sìmbolu de sas libertades bascas. In ie at retzidu sa makila, sa pèrtiga chi rapresentat s’autoridade, dae su predetzessore Iñigo Urkullu.
Custa sa fòrmula de su giuramentu: «Ritzu subra sa terra basca, ùmile in dae in antis de Deus e de sa sotziedade basca, a suta de su Chercu de Guernica, ammentende a sos majores nostros, in dae in antis de sos chi seis rapresentantes de su pòpulu, giuro de cumprire cun fidelidadu su mandadu meu».
Imanol Pradales est nàschidu in Santurce, in sa provìntzia de Biscàglia, in su 1975, in una famìllia chi no est de ratza basca. Est istadu diretore de Bizkaia Talent, un’agentzia pùblica incarrigada de atzapare giòvanos cualificados in su setore de s’innovatzione e de sa connoschèntzia.
(gianni muroni)
Leave a comment