Dae custu mese su Regnu Unidu de Gran Bretagna e Irlanda de su Nord tenet unu partidu nou chi si càndidat a sa ghia de s’istadu. Su 13 de freàrgiu est nàschidu in bia formale Restore Britain, chi su lider est Rupert Lowe.
Nàschidu comente movimentu ocannu passadu como Restore Britain tenet una forma partìtica e si ponet a destra in su panorama eletorale britànnicu.
Lowe, 68 annos, millionàriu e ex presidente de su Southampton Football Club, est istadu elègidu in parlamentu in su 2024 cun sa formatzione de Nigel Farage, Reform UK, dae in ue a coa nche dd’ant bogadu.
Sas càusas sunt, cunforma a sa versione de su partidu, cumportamentos malos a livellu personale cun cumponentes de sa formatzione. Cunforma a Lowe imbetzes est istadu un’”assassìniu polìticu” fatu dae Farage, “una pìbera”, in sas paràulas de Lowe etotu, pro resones siat personales siat polìticas.
Unu de sos motivos de s’iscontru fiat sa figura de Zia Yussuf, su millionàriu de famìllia singalesa e religione musulmana chi Farage aiat fatu presidente de su partidu.
A pustis chi Lowe aiat espressadu dudas subra sa diretzione chi fiat leende su partidu Yussuf dd’at denuntziadu pro minetzas, acusa chi sa politzia britànnica at archiviadu pro falta de fundamentu.
Unu de sos puntu de su programma de Restore Britain est sa gherra a s’immigratzione de massa, siat illegale, siat, in casu de cundennas penales, legale. Pròpiu custa chistione, a pàrrere de Lowe, podet èssere su motivu de sa disamistade cun Yussuf.
Restore Britain est denuntziende cun fortza s’iscàndalu de s’isfrutamentu sessuale de pitzocheddas inglesas de famìllias pòberas dae parte de immigrados pakistanos, chi sas autoridades ant cuadu annos e annos.
S’annùntziu de s’impignu polìticu Lowe dd’at fatu cun unu vìdeu registradu in s’azienda agrìcula cosa sua, pro sutaliniare s’isfortzu in favore de sos sartàrgios britànnicos, minetzados dae sas polìticas econòmicas globalistas de su guvernu.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment