Dae eris prus o mancu 160 mìgia atoras e atores de Hollywood ant incumintzadu s’isciòperu dae su traballu. Cun issos si sunt firmados fintzas sos iscritores de sas pellìculas e de sas sèries televisivas. S’arressada naschet ca su cuntratu generale de su setore no est istadu annoadu. Su sindacadu no at firmadu s’acordu, ca sas domo produtoras non cherent mudare sa manera de pagare sos deretos de autore, a atores minores e mèdios e iscenegiadores, chi sunt galu pensados a su sistema de su tzìnema. Como cun sas aplicatziones de streaming su sistema est cambiadu dae fundu. Mescamente sos iscenegiadores sunt pagados male meda, tantu chi pro meda de issos — fintzas autores de gabbale — est difìtzile meda a abarrare in tzitade comente Los Angeles e New York.
Un’àtera chistione chi sunt ponende sas duas categorias est a subra de sas intellighèntzias artifitziales. Sos atores ant timoria de àere sas caras e sas boghes copiadas de sos computer e de èssere pagados pro pagas iscenas e posca cambiados cun programmas informàticos. Sos iscenegiadores sunt in pidinu unu pagu de mancu, ma sunt pedende giai dae como carchi garantzias a subra de sas automatziones dàbiles de su benidore. Est sa prima borta chi problemas de custa genia intrant in chistiones de traballu e de isciòperos.
S’AMPTP, s’assòtziu de sas domos produtoras, est proende a aguantare, ma fiat dae sos annos Sessanta chi sas duas categorias non s’auniant in una protesta. S’ùrtima borta chi sos iscritores si sunt firmados, in su 2007, Hollywood at pèrdidu prus de duos milliardos de balàngiu.
Gabriele Tanda
Leave a comment