Errementari est sa pellìcula de esòrdiu de su regista bascu Paul Urkijo. Est sa rapresentatzione fìlmica de unu personàgiu de su folklore locale: unu maistru de ferru de gasi malu chi faghet a tìmere finas a su Dimòniu.
Custa figura fantàstica, Patxi Errementaria, fiat su protagonista de contos orales chi su preìderu José Miguel de Barandarián, antropòlogu e etnòlogu, aiat regortu in forma iscrita.
Su contu est ambientadu in su tempus de sa prima gherra carlista, in sa prima metade de su de degheoto sèculos. Urkijo, paris cun su coiscenegiadore Asier Guerricaechevarría, intesset a pare un’amore tràgicu, sa chirca de unu pòsidu e sa vida trista de una pitzochedda pro bogare a pìgiu unu contu intre istòria, religione e maia.
S’atmosfera difatis est sa de cuddu ammisturu intre fide e superstitzione tìpicu de sas comunidades rurales de sos tempos passados.
Pròpiu pro mantènnere s’acàpiu cun sa realidade de s’època Urkijo at detzìdidu de girare s’òpera totu in bascu, impreende comente responsàbile de sos diàlogos a Gorka Lazkano.
Totu sos personàgios faeddant in bascu, ma in variedades diferentes. Est presente s’euskera batua, su bascu ufitziale, ma finas su faeddu de s’ala de Álava, ormai iscumpartu. Pro custu sa produtzione at pedidu s’agiudu de su linguista Koldo Zuazo. In prus s’agatat ateruna pariga de dialetos locales.
A segus de Errementari ddo’at duncas unu traballu filològicu siat pro su chi pertocat sa limba siat pro sa vida de ogna die de su Paisu Bascu de oramai duos sèculos a como.
Sos protagonistas printzipales de su filmi sunt Kandido Uranga, in sa parte de su maistru de ferru, e Uma Bracaglia, chi faghet a Usue, sa pitzochedda.
S’òpera, essida in su 2017, est produida dae Álex de la Iglesia, nàschidu in Bilbao, figura de primu pianu de sa tzinematografia ispagnola.
(gianni muroni)
Leave a comment