Su Comitadu “Energia dèchida” at presentadu unu progetu, cun su matessi nùmene: «unu sistema energèticu sardu – narant –, istudiadu dae sos sardos, pro sos sardos». Sa punna est sa «de nch’essire cantu in antis possìbile dae s’era de sa generatzione de energia derivada dae sa combustione de matèrias fòssiles» movende dae «s’assoluta opositzione a sas tzerachias energèticas chi si cherent impònnere a sa Sardigna tràmite impiantos chi, suta de sa mascaradura de sa transitzione energètica, permitent sa fura de sas risursas energèticas nostras rennovàbiles (sole, bentu e mareas) dae parte de sos peus corsaros de su setore». Su documentu l’ant publicadu in su grupu facebook de su comitadu: deghe pàginas articuladas pro propònnere unu sistema integradu cun una smart grid, «un’internet de s’energia» movende dae sas comunidades energèticas, dae sos condomìnios de autoconsumu colletivos e dae sas domos smart cun energy box. Sa punna est chi «medas sardos – narant sos de su comitadu –, in unu percursu cumpartzidu fintzas cun unas cantas amministratziones comunales, raportende·si a su problema cun responsabilidade» potzant «aviare unu protzessu de transitzione energètica, dèchidu e urgente». Custos sos puntos – a bisu de su comitadu – de su progetu de sistema energèticu sardu: «zero produtzione de CO2; zero combustione di fòssiles de cale si siat gènere; zero usu chìmicu de fòssiles o àteru chi residuant CO2 o àteras sustàntzias luadoras de su logu e de sa gente; zero gasdotos definitivos». «In una economia tzirculare e collaborativa chi cunsìderat su bene no in cantu propiedade ma pro sa funtzione chi isse faghet in sa sotziedade – serrant sos proponentes de “Energia dèchida” – si proponet s’istitutzione de sa Rèndita Energètica pro pòdere comporare sos impiantos e superare sa Povertade Energètica».
màuru piredda
Leave a comment