Como b’at su Covid e cras, a dolu mannu, at a èssere su matessi. Si andat bene, podimus isperare chi sa situatzione megioret in pagu tempus, ma nessi pro carchi mese su problema at a abarrare. Tando sa duda manna est: comente semus ammanigende s’atòngiu in Sardigna?
Unu problema, chi est nàschidu in su cabudanni de su duamìgia e binti, est istadu sos pagos trasportos pùblicos pro andare a traballu o a iscola. Difatis in classe o in sos ufìtzios sas medidas de seguresa sunt sighidas e b’at persones chi cumpudant chi totus fatant su chi tocat. Su problema mannu est chi in sos postalinos intre sas biddas, o peus intre una matessi tzitade, sa gente est a curtzu prus de cantu si podet e pro su calore, a s’ispissu, si abbàssiat sa mascheredda. Ite sunt fatende pro barigare custu problema?
Un’àtera chistione de importu pro arressare su Covid est cussa de assistire sos malàidos de su logu in manera lestra, mancari in domo e, mescamente, sena los mantènnere meda a tràvigu. E non nos depimus iscarèssere nemmancu chi no esistit petzi su Covid, ma fintzas maladias chi ant bisòngiu de lestresa pro sanare o, a su revessu, tenent netzessidade de contivìgiu pro tempus meda. Comente s’at a fàghere si ispidales minores, comente su de Sòrgono, sunt morende e si biddas medas no ant mancu sa bàrdia mèiga?
Problemas de ammanìgiu chi ant a peorare si non si sanat su trìulu chi b’at in sas istitutziones sardas. Su cambiamentu dae un’azienda ùnica a oto ASL noas no est agiudende sa situatzione, ca como si depent tancare sos contos e posca inghitzare a partzire su dinari e pònnere sa gente in sos rolos de importu in cada ASL. Abbolotu chi s’annanghet a su trìulu. In su mentres, in Regione sa majoria est batalliende pro seberare chie pònnere a ghia de sa Cummissione pro sa sanidade: s’UDC, su PSd’Az, sa Lega e sos àteros partidos depent contivigiare sos echilìbrios pro non iscontzare sa Giunta.
Si podent sestare milli medidas e impitare duas mìgias trastes, ma est a pistare s’abba si sos problemas istruturales no ant a agatare una solutzione.
Gabriele Tanda
Leave a comment