“Donna Berta” de Leopoldo Clarín Alas, òpera traduida in sardu dae Giovanni Muroni e publicada dae Condaghes in su 2012 (colletzione Àndalas).
S’ùnica cosa chi donna Berta aiat otentu fiat a ddi permìtere de assìstere a s’atu solenne e tristu de nche calare su cuadru e de dd’impachetare pro su biàgiu longu; dda lassaiant andare a si dispidire pro semper dae su capitanu suo, dae su fìgiu presuntu. Carchi cosa in prus aiat ofertu su millonàriu; de mantènnere su segretu, ddoe diat mancare; ma riservende·si de cumintzare a investigare pro identificare s’originale de cudda figura, semper chi no esseret totu una fàula su chi contaiat sa betza. E donna Berta si fiat dispidida finas a sa die in fatu, s’ùrtima, bastante trancuilla, non ca fiat ressignada, ma ca galu isperaiat de bìnchere. De seguru Deus dda cheriat provare meda, e fiat riservende pro s’ùrtimu momentu su miràculu. “Oh, ma ddoe diat àere unu miràculu!”
Leave a comment