“Donna Berta” de Leopoldo Clarín Alas, òpera traduida in sardu dae Giovanni Muroni e publicada dae Condaghes in su 2012 (colletzione Àndalas).
Donna Berta misturat e confundet a intro suo s’idea de onorabilidade e de soledade, de isulamentu; cun una cara de pasca faghet sa vida de unu muni… chi filat e sàbunat sa roba, roba meda, bianca, in domo, e chi faghet su pane in domo puru. Ddu faghet ogna chimbe o ses dies; e in custa faina, chi ddoe cheret mùsculos prus fortes chi non sos suos e de Sabel puru, giai malecontza, ddas agiuat sa fìgia macoca de su mesapareri; ma pro filare, issas ebbia, sas duas betzas: e pro sos pannos, comente torrat sa roba dae su riu, issas ebbia su matessi. S’ortu de susu s’ammuntat de biancu cun sos pannos ispartos, e dae sa domighedda de sa costa, dae ue si bidet totu, donna Berta, surda, calliada, cuntemplat risulana, e dende sas gràtzias a Deus, su nie de linu immaculadu chi tenet a suta, e su birdore, chi paret sabunadu issu puru, chi inghìriat sos pannos, finas a su padente de sa domo, e calende finas a su cungiadu e finas a s’Aren; chi paret tùndidu dae unu barbieri delicadu, e agiumai paret una persone totu abbarbiada, totu insabonada e totu profumada. Eja. Paret chi ddi seghent s’erba a fòrfighes e a coa dd’insabonent e dd’innetent: no est totu pranu, est unu pagu revessadu, nche calat in modu misteriosu in cue a chirru de sos fumajolos, cando basat su riu: e donna Berta milli bias aiat disigiadu de tènnere manos de gigante, mannas cantu nd’arat unu giuu in una die, pro nche ddas colare in s’ischina a s’Aren, nen prus e nemmancu de comente si faghet a su gatu. Cando est de mala mùtria sos ogros, cando cuntemplant su pradu, si firmant in sas duas àndelas chi ddu rugant; mantzas infames, rastros de sa plebe, de cuddos pedditzones chi, pro imbìdia, pro importunare, pro malìtzia ebbia, mantenent sena bisòngiu, sena perunu motivu, cuddas tzerachias pùblicas, disonore de sos Rondaliegos.
Leave a comment