Est essidu, publicadu dae sas editziones Condaghes, Sas Domos de Janas. Patrimòniu de s’umanidade. Dd’at iscritu Giuseppa Tanda, cun sa tradutzione in sardu de Gabriele Tanda.
Est unu libru chi tzèlebrat, cun sas paràulas e cun sas immàgines, custos monumentos, logos antigos de interru, chi caraterizant sa preistòria sarda. A acumpangiare su testu de sa professora Tanda difatis ddoe sunt sas fotografias de Andrea Gambula.
Nàschidu in Cuartu e apassionadu de logos istòricos de Sardigna, massimamente de cuddos prus pagu connotos o ismentigados, passione chi mandat a in antis cun su grupu Pecore Nere Urbex, Gambula at garantidu a sa publicatzione un’aparadu fotogràficu chi chircat de torrare sa lughe e s’ammaju naturale de custas tumbas de antigòriu.
Su libru est sa concrusione naturale de su traballu de sa professora Tanda, ordinàriu de Preistòria e Protoistòria in s’Universidade de Casteddu e diretora de s’Iscola de Ispetzializatzione in Benes Archeològicos de su matessi ateneu finas a su 2012.
In su 2017, paris cun àteras ses persones, Tanda at fundadu su CESIM (Centro Studi Identità e Memoria). Intre sos obietivos de s’assòtziu ddoe fiat su de insertare s’architetura preistòrica de Sardigna in su patrimòniu UNESCO.
Su resurtadu est istadu otènnidu ocannu passadu. Non totu sos monumentos de cuddu tempus antigu, ma 18 necròpolis. Sas domos de janas duncas ant tentu unu reconnoschimentu a livellu mundiale.
Su testu, chi cheret èssere un’òpera divulgativa, faghet un’excursus subra s’istrutura de custas domos de sos mortos, sa simbologia issoro e finas sa genia de sotziedade chi ddas at produidas.
Dae S’Alighera a Mamujada, dae Portu Turres a Crabonaxa, dae Bonorva a Guasila, pro nde mentuare calicuna ebbia, su letore tenet una visione cumpleta de custos logos, parte fundamentale de s’istòria e de sa cultura de sos sardos.
De su testu est disponìbile finas sa versione in italianu.
(gianni muroni)
Leave a comment