Bastat cun sa distributzione discretzionale de fundos pùblicos, nemmancu un’èuru cheret assignadu sena bandu; istitutzione de unu “Fundu pro su benidore” chi finàntziet bandos pùblicos noos cun totu sos assòtzios e Comunes chi bi podent partetzipare sena favoritismos; critèrios ogetivos de valutatzione cun indicadores craros chi prèmient sa sustenibilidade de sos progetos; fundos istruturales pro assòtzios e Comunes cun règulas craras e pretzisas pro totu cantos pro mèdiu de su finantziamentu de su fundu ùnicu e de sas leges de setore. Sunt custos sos bator puntos istèrridos dae Sardegna chiama Sardegna a pustis de s’intregu nou de dinare «sena bandos cun rilevàntzia pùblica e nen critèrios de valutatzione trasparentes e ogetivos». «Cada annu – narant – milliones de èuros los partzint a discretzione de su Cussìgiu regionale. In su 2024 sos cussigeris de tzentru manca e de tzentru dereta ant a primu dadu a entes, assòtzios e Comunes “amigos” prus de 17 milliones cun s’alliongiadu G de s’assestamentu de bilàntziu 2024-2026, posca, a comintzos de santandria, belle 22 milliones e 500mìgia èuros cun s’alliongiadu 4 de sa variatzione noa de bilàntziu. In urtimera, prus de 178 milliones cun s’emendamentu 2380 a su disegnu de lege 85, sa lege de istabilidade regionale». Sos de Sardegna chiama Sardegna, movende dae custas chistiones, ant abertu una petitzione in sa prataforma change. «Pedimus a sa Giunta Todde e a totu su Cussìgiu regionale de nde la finire de su totu cun custa ispirale vitziosa e clientelare chi dannos meda faghet a s’Ìsula nostra ca nch’isperdìtziat risorsas pùblicas sena lògica unitària e programmatòria peruna. Seberare unu modellu de gastu pùblicu chi movet dae sa trasparèntzia, dae s’agualidade e dae sa valutatzione de s’impatu reale de sos progetos est s’ùnica manera sèria pro torrare cunfiàntzia in sas istitutziones».
Leave a comment