Su 22 de martzu est sa die mundiale de s’abba. Sas Natziones unidas ant istituidu custa ricurrèntzia su 1992 a pustis de sa Cunferèntzia de Rio de Janeiro in contu de ambiente e in ue bi partetzipeint 172 guvernos, 198 cabos de istadu o de guvernu e 2.400 rapresentantes de Ong. Est duncas dae pagu chi si chistionat de comente amparare sa printzipale de sas resursas pro sa vida nostra. Su tema de ocannu est su de sa cunservatzione de sas nieras sende chi – comente leghimus in sa pàgina Worlds water day de s’Onu – «s’abba issoro de fusione est de importu mannu pro sos impreos tziviles, pro sa massaria, pro s’indùstria, pro sa produtzione de energia pulida e pro sa salude de sos ecosistemas».
Comente semus bidende, cun su cambiamentu climàticu s’isorvimentu de sas nieras est semper prus lestru. E cun sa ridutzione semper prus manna de sas superfìtzies astradas, su tziclu de s’abba si faghet prus imprevedìbile e estremu. Sas cunsighèntzias non sunt pagas e non sunt pro pagos: milliardos de persones sunt interessados dae alluviones, sicagna, franas e crèschida de su livellu de sas abbas marinas.
E, comente fìamus narende, dannos meda b’at pro sos ecosistemas. Est pretzisu, pro cussu, chi intervengiamus dae duos chirros: adotare istrategias locales pro limitare sos dannos de su fenòmenu; reduire a livellu globale sas emissiones de carbòniu. E dae sas Natziones unidas matessi lompet un’apellu pro chi si càmbiet pàgina: «Piga parte – leghimus – a sa campagna globale pro s’amparu de sas nieras. Amus bisòngiu chi totus, dae sos tzitadinos sìngulos e dae sas famìlias a sas aziendas e a sos guvernos, fatzant su chi li est possìbile pro reduire su callentamentu globale e pro s’adatare a sa mèngua de sas nieras». Ma seguros semus chi tzitadinos e guvernos devent èssere postos in su matessi apellu che chi sas responsabilidades de sos primos siant sas matessi de sos segundos?
Gianfranca Orunesu
(Foto de Gabriel Kuettel)
Leave a comment