S’Iran at nominadu a Hossein Dehghan Segretàriu de su Cussìgiu Supremu de sa Seguresa Natzionale. Leat su postu de Alì Larijani, mortu a suta de sos bombardamentos israeloamericanos su 17 de martzu.
Dehghan, 69 annos e ex ministru de sa Difesa, est un’esponente de sos pasdaran, sas Guàrdias de sas Rivolutzione Islàmica. A pitzocu aiat partetzipadu a s’ocupatzione de s’ambasciada americana in Teheran in su 1979.
Unos chimbighentos istudiantes islàmicos aiant leadu possessu de sa sede diplomàtica de sos Istados Unidos e aiant tratènnidu comente presoneris una chimbantina de diplomàticos istadunidensos.
S’operatzione, unu disafiu polìticu e ideològicu a sos USA, fiat cumintzada su 4 de santandria de su 1979 e si fiat concruida su 20 de ghennàrgiu de su 1981, durante de presidèntzia de Jimmy Carter.
Su sèberu de Dehghan si presentat duncas in continuidade cun sa detzisione de su regime de sos ayatollahs de no atzetare trèguas o cumpromissos a pustis de s’atacu a s’Iran.
Custu cunflitu est aberende unu fronte internu in sos Istados Unidos puru. Su 17 de martzu Joe Kent, Diretore de su Tzentru Natzionale Antiterrorismu, s’est dimìtidu.
«Non potzo in cussèntzia èssere de acordu cun custa gherra in Iran», at iscritu in sa lìtera de dimissiones.
«S’Iran non rapresentat como a presse unu perìgulu pro sa natzione nostra e est craru ca amus cumintzadu custa gherra neghe de sa pressione de Israele e de sa lobby americana sua poderosa», at agiuntu.
Kent at sighidu narende ca sa tàtica de Israele pro nche tragiare s’Amèrica in custa gherra est sa matessi chi aiat impreadu pro sa gherra in Iraq.
Pro como duncas sa gherra sighit, cun sos iranianos detzìdidos a rispòndere a sos atacos cun bombardamentos contra a Israele e a sos paisos de sas penìsula aràbica chi tenent bases militares americanas.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment