S’ONU e s’UNESCO ant dedicadu custos deghe annos imbenientes a sas limbas indìgenas chi si nche sunt morende (incarca inoghe pro lèghere su documentu). Su problema est chi prus de su 95% de sas persones faeddat su 4% de sas limbas connòschidas, s’àtera gente faeddat su 96% de sas limbas. Intre a custas b’at fintzas su sardu chi difatis est in arriscu artu de iscumpàrrere intre custu sèculu.
Sa polìtica chi cherent sighire sas duas istitutziones est de custrìnghere sas istitutziones de sos Paisos a amparare sas limbas de minoria e de dare impèllida a chie at dinari a si impinnare in s’isfortzu de sarvare unu patrimòniu immateriale e ispirituale de importu mannu pro totu s’umanidade. Google at incumintzadu giai dae carchi annu a si mòvere fraighende s’aplicatzione Woolaroo, chi pro more de s’intellighèntzia artifitziale reconnoschet sas prantas o sos animales e los bortat in sa limba seberada, intre a sas optziones b’at su sitzilianu,ma mancat galu sa limba sarda (incarca inoghe pro lèghere de prus).
Pro custa resone ant detzisu de pònnere a pare s’amparu de sas limbas de minoria cun sas punnas de s’Agenda 2030, chi est fintzas una lìnia pro s’insegnamentu in sas iscolas. Cheret nàrrere chi como sos mastros chi cherent imparare a sos istudiantes su sardu, o fintzas ispricare àteras fainas in sardu, lu podent fàghere a suta de sas lìnias ghias de s’ONU e de s’Europa.
(redatzione)
Leave a comment