Si narant AI Deepfake detection e AI Defocus eye protection. Duas funtzionalidades de importu mannu, creadas dae sa sotziedade globale de telefoneddos intelligentes Honor, presentadas in Shangai in s’addòbiu mundiale Al Mobile World Congress.
Un’àmbitu,custu, in ue s’intelligèntzia artifitziale l’impreant pro finalidades positivas e protetzione.
Sa Deepfake detection podet rilevare contenutos digitales farsados (sos deepfake) e naschet contra a sas trampas biomètricas chi, mescamente como, sunt creschende meda. S’aplicativu de Honor analizat sos fotogrammas de sos vìdeos e, movende dae unos cantos paràmetros, resesset a identificare petzi in 3 segundos particulares chi sos ogros umanos non podent retzire e, s’in casu, avisat a s’utente.
Sos algoritmos de anàlisi cunsìderant, pro nàrrere, sa craresa de sas immàgines, su cuntatu visivu e s’illuminatzione pro chi bèngiant iscobiados sos contenutos manipulados.
Sa Defocus eye protection punnat a reduire s’arriscu de miopia: a minudu, impreat s’intelligèntzia artifitziale pro istòrchere s’efetu de sos otzales de defocus in s’ischermu de su telefoneddu. Ma, comente ammentat sa sotziedade, no est un’istrumentu mèigu e non tenet peruna finalidade terapèutica: serbit petzi pro pasare sos ogros.
«S’Intelligèntzia Artifitziale est operende una rivolutzione in sas vidas nostras, est faghende progredire su setore de sos telefoneddos intelligentes – narat George Zhao, amministradore delegadu de Honor – mancari sa parte prus manna de sas aziendas si siat focalizende supra s’IA cun cloud chi, però, est petzi una cumponente de su progressu. S’Intelligèntzia Artifitziale on-device est un’oportunidade ùnica pro fornire servìtzios a mesura de sos impitadores e de sas preferèntzias issoro. Comente Honor, creimus chi s’IA in sos dispositivos tèngiat su potentziale pro afortire sas cumpetèntzias de sos utentes».
Gianfranca Orunesu
Leave a comment