de Salvatore Serra
Cun unu modellu innovadore de còdighe abertu, costu bassu e capatzidade manna, DeepSeek ponet marrania a sos modellos isvilupados dae impresas americanas che a OpenAI, sa chi at bogadu a campu ChatGPT.
Su modellu DeepSeek-R1, essidu a pìgiu de reghente, est a tretu de cumpètere cun sos modellos prus avantzados de sos Istados Unidos in sa resolutzione de problemas matemàticos, programmatzione e inferèntzia de su limbàgiu naturale. Cun unu costu de isvilupu de 5,57 milliones de dòllaros ebbia, inferiore meda a sos istantziamentos multimillionàrios de àteros modellos, DeepSeek punnat a sa capatzidade e a sas tècnicas avantzadas de imparòngiu automàticu.
Una de sas resones de sa resessida de DeepSeek est su mètodu suo de “còdighe abertu”, chi permitit a sos isvilupadores de totu su mundu de analizare, modificare e adatare su modellu cunforma a sas ntzessidades suas. Custu cuntrastat cun sos modellos prus retstritivos de sas impresas otzidentales e at generadu un’interessu mannu in sa comunidade tecnològica.
Sa posta in òpera de custa intelligèntzia artifitziale lompet in unu mamentu de tensiones intre sa Tzina e sos Istados Unidos. Su guvernu nordamericanu at impostu restritziones a s’esportatzione de chip avantzados, però DeepSeek at respostu cun protzessadores H800 de Nvidia, disinnados in manera ispetzìfica pro su mercadu tzinesu.
A dolu mannu b’est su problema de sa tzensura imposta dae su guvernu tzinesu. Sighende su regulamentu de su 2023, su modellu si negat de torrare imposta a pregontas a pitzu de temas polìticos sensìbiles, comente su massacru de Tiananmen o s’indipendèntzia de Taiwan, torrende a indiritzare sos usuàrios chirru a problemas de matemàtica o programmatzione.
Leave a comment