Sàbadu 3 de ghennàrgiu su tenore Dave Monaco at ofertu unu recital in su Teatru Tzìvicu de Tàtari. S’ispetàculu fiat s’ùrtimu de sa rassegna Voci di Natale, dedicada a sa mùsica lìrica, organizada dae Ars Aurelia, cun sa diretzione de Irene Dore.
S’artista, chi ocannu passadu est arribadu su de tres in su cuncursu Operalia, sa manifestatzione pro cantantes giòvanos ideada dae Plácido Domingo, at propostu Che farò senza Euridice, dae Orfeo ed Euridice de Gluck, Il mio tesoro intanto, dae su Don Giovanni de Mozart, de Rossini Mi lagnerò tacendo, Il fanciullo smarrito, Sì, ritrovarla io giuro, dae La Cenerentola, Cessa di più resistere, dae Il Barbiere di Siviglia, La danza, e galu È la solita storia del pastore, dae L’Arlesiana de Cilea, Bella enamorada, dae sa zarzuela El último romántico, de Soutullo e Vert, Ma rendi pur contento e Malinconia, ninfa gentile de Bellini e in fines Una furtiva lagrima, dae L’elisir d’amore de Donizetti.
In prus, comente bis, at cantadu duos clàssicos napoletanos: Torna a Surriento e Core ‘ngrato.
Dd’at acumpangiadu a su pianoforte Marco Schirru. At presentadu Simone Azzu.
(gm)
Leave a comment