Su 2021 at a èssere su de setighentos anniversàrios de sa morte de Dante Alighieri. Su poete cunsideradu su babbu de sa limba italiana at bogadu fama in totu su mundu pro s’òpera sua prus connota, sa Divina Cummèdia.
Finas s’Oriente A tesu, chi non tenet una cultura cristiana, est istadu conchistadu dae sas descritziones bias e fortes de su mundu ultraterrenu, massimamente de s’Inferru.
A Dante e a sa Cummèdia sua Go Nagai, unu de sos fumetistas giaponesos prus famados, at dedicadu una sèrie de volumes, regortos in unu libru ùnicu in s’editzione italiana de sa Edizioni BD.
Sas tàulas sunt postas rispetende s’originale nipònicu, est a nàrrere dae destra a manca.
Sa parte manna de s’òpera est dedicada a s’Inferru, de seguru sa càntiga prus populare de su poema de su fiorentinu.
Sas figuras de Nagai sunt modelladas in cuddas de Gustave Doré, s’artista frantzesu connotu pro àere pintadu sas figuras de paritzos clàssicos de sa literadura otzidentale, che a sa Divina Cummèdia, su Don Chisciote e sa Bìblia. S’istile est duncas prus europeu, finas si s’apartenèntzia de sas figuras a sa traditzione nipònica est crara.
S’autore mustrat de connòschere, o nessi de àere istudiadu pro s’ocasione, aizu de teologia cristiana. Giai a pitzocu, cando galu fiat assistente de su maistru Shotaro Ishinomori, àtera figura istòrica de sos fumetos de su Giapone, Nagai fiat istadu influentzadu dae su poete fiorentinu.
No est de badas chi s’òpera de esòrdiu est istada Mao Dante.
Go Nagai, nùmene de arte de Kyoshi Nagai, est nàschidu in su 1945. A pustis de s’esòrdiu subranaradu de Mao Dante, sa segunda produtzione est istada Devilman. Ma est dae su 1973 a su 1975 chi Nagai produit personàgios destinados a intrare in s’immaginàriu colletivu finas europeu: Mazinga Z, Il Grande Mazinga, Getter Robot, Jeeg e Goldrake.
(gianni muroni)
Leave a comment